تخيل إنك واقف قدام عشرات الكمبوندات في التجمع الخامس، كل واحد بيوعدك بحياة أفضل ومستقبل مضمون.. السؤال اللي بيحيرك مش أشتري ولا لأ؟ السؤال الحقيقي هو: أشتري من مين؟
الفرق بين مطور عقاري محترم بيسلم في ميعاده ويحترم التزاماته، وبين مطور تاني ممكن يضيع فلوسك ووقتك، هو الفرق بين استثمار ناجح وكابوس مستمر، وفي السوق المصري للأسف النوعين موجودين.
هنقولك في المقال ده إيه اللي تتوقعه من كل مطور، وإيه اللي يميزه، وإيه المشاريع اللي فعلاً تستحق فلوسك.
ليه تفكر في التجمع الخامس بالذات؟
قبل ما ندخل في تفاصيل الشركات والمطورين العقاريين، لازم تفهم الأول ليه التجمع الخامس بقى اختيار ذكي مش مجرد منطقة معروفة وخلاص.. الحقيقة إن المنطقة بقيت واحدة من أقوى الخيارات السكنية والاستثمارية للأسباب دي:
- القرب من العاصمة الإدارية: المنطقة على بعد 15-20 دقيقة بس من العاصمة، وده خلاها خيار مثالي للي بيدوروا على سكن قريب من الوزارات والحكومة، كمان ده رفع قيمة العقارات بشكل ملحوظ.
- البنية التحتية المميزة: المنطقة فيها مدارس دولية شغالة (AUC، الجامعة الألمانية، مدارس انترناشونال كتير)، ومستشفيات كبيرة زي السعودي الألماني وكليوباترا، ومولات ضخمة زي كايرو فيستيفال وداون تاون مول وبوينت 90.
- السهولة في البيع: لو قررت تبيع العقار بتاعك بعد كام سنة، هتلاقي مشترين بسهولة، لأن
- تنوع الخيارات: فسواء كانت ميزانيتك 2 مليون أو 20 مليون، هتلاقي خيارات مناسبة ليك في المنطقة من الشقق الاقتصادية للفلل الفاخرة.
لكن خلي بالك إن مش كل مشروع في التجمع الخامس يعتبر استثمار ناجح، لأن الموقع الدقيق داخل التجمع وسمعة المطور وجودة التنفيذ دول اللي بيفرقوا.
معايير اختيار المطور العقاري
قبل ما تاخد قرار الشراء، في معايير أساسية لازم تشوفها في أي مطور عقاري، ودي أهمها:
- السمعة وتاريخ التسليم: لازم تشوف الشركة سلمت مشاريعها السابقة في المواعيد ولا لأ، وإيه تقييمات العملاء اللي تعاملوا معاهم.
- جودة التنفيذ: زور مشاريعهم المسلمة واتكلم مع سكان حقيقيين عشان تعرف مستوى التشطيب والبناء هناك، لأن الشركات الكويسة بتفضل جودة مشاريعها عالية حتى بعد سنين.
- الوضع المالي للشركة: الشركة لو مديونة أو بتعاني ماليًا، مشروعك هيكون في خطر، عشان كده دور على شركات ليها قاعدة مالية قوية ومشاريع متعددة شغالة بنجاح.
- جودة التصميم والتنفيذ: حاول تزور الموقع أثناء الإنشاء لو قدرت، وشوف جودة الحديد والخرسانة، ةاتكلم مع المهندسين الموجودين.
- خدمة العملاء: جرب تتصل بخدمة العملاء قبل الشراء، وشوف هيردوا عليك بعد ما تشتري ولا هيختفوا، كمان اقرأ تجارب عملاء سابقين على جروبات الفيسبوك وصفحات المراجعات.
- المرونة في السداد: الشركات الواثقة في نفسها بتقدم تسهيلات حقيقية في الدفع، فلو لاحظت إن الشركة عايزة نسبة كبيرة مقدم وتقسيط قصير، ده ممكن يكون علامة إنها محتاجة سيولة.
أفضل شركات التطوير العقاري في التجمع الخامس
دلوقتي هنتعرف على أفضل شركات التطوير العقاري وأهم مشاريعهم ومميزاتهم:
1. بالم هيلز للتطوير العقاري
بالم هيلز من المطورين العقاريين المعروفين في مصر، الشركة موجودة من سنة 2005 وعندها portfolio ضخم من المشاريع المسلمة فعلاً مش بس على الورق.
الشركة مش بس شركة تطوير عقاري، دي مؤسسة عقارية كاملة مدرجة في البورصة المصرية، وده معناه إن فيه شفافية مالية وحوكمة، وإنك تقدر تشوف النتائج المالية بتاعتهم كل ربع سنة.
كمان الشركة اشتغلت في أكتر من منطقة زي القاهرة الجديدة والساحل الشمالي و 6 أكتوبر والعين السخنة، وده بيدي استقرار مالي لأن الشركة مش معتمدة على منطقة واحدة بس.
أبرز مشاريع بالم هيلز في التجمع الخامس
دي مجموعة من أهم وأشهر مشاريع شركة بالم هيلز:
بالم هيلز القطامية (Palm Hills Katameya)
ده المشروع الرئيسي لبالم هيلز في التجمع الخامس، وواحد من أنجح مشاريعهم.. مساحته الكلية حوالي 1.2 مليون متر مربع، يعني مش كمبوند صغير ده مدينة سكنية متكاملة، والمشروع ده بيتميز بالتالي:
- التنوع الكبير في الوحدات: لأن فيه شقق تبدأ من 120 متر وتاون هاوس وتوين هاوس وفلل مستقلة بتوصل لـ 600 متر.
- التصميمات المعمارية المميزة: والمستوحاة من الطراز الأوروبي المعاصر، مع اهتمام كبير بالتفاصيل.
- مرافق وخدمات متكاملة: المشروع فيه نادي اجتماعي ورياضي على مساحة ضخمة وجيم وحمامات سباحة أولمبية ومدرسة دولية (Palm Hills International School) ومسجد كبير وعيادات طبية وحضانة للأطفال.
- المساحات الخضراء: حوالي 65% من المساحة الكلية مخصصة للمساحات الخضراء واللاندسكيب والخدمات، و35% بس للبناء، وده بيخلي الكثافة السكانية معقولة والمكان مريح للعين.
موقع بالم هيلز القطامية
الكمبوند بيقع على طريق القطامية الرئيسي، وعلى بعد 5 دقايق بس من الجامعة الأمريكية، و10 دقايق من قلب التجمع الخامس، وعلى بعد 20 دقيقة من العاصمة الإدارية.
ودي خريطة هتعرفك على موقع الكمبوند بشكل مفصل:
حالة مشروع بالم هيلز
المشروع اتسلم بالكامل تقريبًا،وفيه ناس ساكنة فعلاً من أكتر من 5 سنين، ودي ميزة كبيرة لأنك تقدر تزور وتشوف الحياة الحقيقية هناك.
مميزات بالم هيلز كمطور عقاري
بالم هيلز بتوفرلك مميزات كتيرة مش هتلاقيها في أي شركة تانية، ودي أهمها:
- جودة التنفيذ والتشطيب: بالم هيلز بتشتغل مع أكبر المقاولين في مصر ومش بتوفر في الخامات سواء الخرسانة أو الحديد أو السباكة أو الكهرباء، كل حاجة بتكون بمعايير عالية، كمان التشطيبات بتيجي Super Lux فعلاً مش بالاسم سواء السيراميك، الأبواب، الشبابيك، الدهانات.. كلها ماركات معروفة ومضمونة.
- خدمة ما بعد البيع: بعد ما تستلم الوحدة، بالم هيلز عندها فريق صيانة دائم، فلو حصلت أي مشكلة في فترة الضمان (سنة أو سنتين حسب العقد)، بيتعاملوا معاها بسرعة.
- الإدارة والتشغيل للكمبوندات بتكون على مستوى عالي من حيث النظافة والأمن وصيانة المساحات الخضراء.
- القيمة الاستثمارية: العقارات بتاعت الم هيلز بتحافظ على قيمتها وبتزيد مع الوقت، فلو اشتريت وحدة من 5 سنين هتلاقي إن دلوقتي سعرها أعلى بكتير من سعر الشراء.
- الشفافية المالية: لأن الشركة مدرجة في البورصة وكل حاجة شفافة، وتقدر تشوف النتائج المالية والمشاريع الجديدة والديون كمان، وده يخليك مكمن إن الشركة مستقرة ماليًا.
- التنوع في أنظمة السداد: بالم هيلز بتقدم أنظمة دفع مرنة بتوصل لـ 8-10 سنين في بعض المشاريع، كمان المقدم بيبدأ من 10-15% وباقي المبلغ بيكون بالتقسيط.
- التصميمات المعمارية: بالم هيلز بتشتغل مع أفضل المكاتب الاستشارية المعمارية محليًا ودوليًا، ودي بيخلي التصميمات مش بس حلوة من بره، دي كمان ذكية في استغلال المساحات والإضاءة الطبيعية والتهوية.
- الالتزام بالتسليم: ده أهم ما يميز بالم هيلز، الشركة عندها سجل نظيف جدًا في التسليم في المواعيد المحددة أو حتى قبلها أحيانًا، كمان مشاريعهم القديمة زي بالم هيلز 6 أكتوبر وبالم هيلز القطامية اتسلمت كاملة وسكان الناس فيها من سنين.
2.المراسم للتطوير العقاري
المراسم من الشركات اللي عملت ضجة كبيرة في السوق المصري في السنوات الأخيرة، لأن الشركة قدرت في وقت قصير نسبيًا إنها تنافس كبار المطورين وتاخد مكانة قوية.
الشركة اتأسست سنة 2014، يعني شركة حديثة الإنشاء مقارنة ببالم هيلز أو سوديك، لكنها قدرت تثبت نفسها بسرعة، لأن الفكر بتاع الشركة مختلف شوية، فهي بتركزعلى التصميمات المبتكرة والـ lifestyle concepts أكتر من المشاريع السكنية التقليدية.
الشركة متميزة بإن عندها فريق تصميم داخلي قوي، وبيجيبوا أفكار جديدة من أوروبا وأمريكا وبيطبقوها في مصر، وده خلاهم يبقوا محبوبين عند الشباب، ودي أهم مشاريع الشركة:
سيتي أوف ووندرز (City of Wonders)
ده المشروع الأيقوني للمراسم في التجمع الخامس، وممكن يكون أشهر مشروع ليهم على الإطلاق، والمشروع ده كل منطقة فيه مستوحاة من مدينة عالمية شهيرة زي باريس ولندن ونيويورك وبرشلونة وغيرهم، والمشروع مميز بالتالي:
- تصميمات حديثة: زي أبراج شبه الـ Big Ben في لندن، ومناطق مميزة بطابع Haussmann الباريسي وشوارع شبه Manhattan.
- المساحة والتوزيع: المشروع بيمتد على مساحة حوالي 1000 فدان يعني حوالي 4.2 مليون متر مربع تقريبًا.
- التوزيع ذكي: هتلاقي إن 20% بس مباني في المشروع و80% مساحات خضراء وخدمات ومرافق.
- الوحدات المتنوعة: هتلاقي في المشروع شقق بتتكون من غرفة واحدة لـ 4 غرف يعني مساحتها من 80 متر لـ 250 متر ودوبلكس وبنتهاوس وتاون هاوس وتوين هاوس.
- الخدمات والمرافق: موجود Wonder Mall وده مول تجاري ضخم جدًا مبني على مساحة 70,000 متر مربع، وموجود فيه ماركات عالمية ومطاعم وسينما وهايبر ماركت.
- Wonder Park: ودي حديقة مركزية بتمتد على مساحة 40 فدان ومتميزة بتصميم لاندسكيب عالمي.
- نوادي رياضية: موجود في المشروع نادي رياضي واجتماعي فيه كل الرياضات زي التنس والاسكواش وبادل وحمام سباحة أولمبي وجيم.
- خدمات تعليمية مميزة: موجود مدارس دولية زي British Columbia Canadian School.
موقع سيتي أوف ووندرز
المشروع موجود على طريق التسعين الجنوبي وقريب من الجامعة الأمريكية والجامعة الألمانية، كمان بعيد عن المسافة للعاصمة الإدارية بحوالي 15 دقيقة بس.
حالة مشروع سيتي أوف ووندرز
مراحل كتيرة من المشروع اتسلمت والناس ساكنة هناك فعلاً، كمان المول شغال والخدمات الأساسية متوفرة، لكنخفي مراحل لسه بتتبني وبتتسلم تدريجيًا.
مميزات المراسم كمطور عقاري
شركة المراسم ليها مميزات كتيرة خليتها مطور عقاري قوي، ودي أهمها:
- الابتكار في التصميم: دي أكبر نقطة قوة للمراسم، لأنهم مش بيعملوا كمبوندات تقليدية دول بيجيبوا أفكار جديدة وبيطبقوها و City of Wonders يعتبر مثال حي على ده.
- القيمة مقابل السعر: الشركة بتقدم جودة كويسة جدًا بأسعار أقل من بالم هيلز وسوديك، عشان كده لو ميزانيتك محدودة وعايز كمبوند محترم فشركة المراسم هتبقى خيار ممتاز ليك.
- خدمات ومرافق مميزة: الشركة بتوفر مشاريع فيها النوادي الرياضية والاجتماعية مجهزة كويس وبتقدم أنشطة متنوعة للكبار والصغيرين.
- سرعة التنفيذ: الشركة بتتميز بسرعة التنفيذ مقارنة بشركات تانية، ومشاريعهم بتتسلم في مواعيد معقولة ولو حصل تأخير فبيكون لمدة بسيطة.
- أنظمة السداد المرنة: الشركة بتقدم تسهيلات في الدفع بتوصل لـ 10 سنين في بعض المشاريع، كمان المقدم بيبدأ من 5-10% في بعض العروض، وده بيخلي الدخول للسوق سهل.
3. قطامية ديفلوبرز (Qatameya Developments)
قطامية ديفلوبرز من الشركات اللي ارتبط اسمها بمنطقة القطامية في التجمع الخامس، والشركة متخصصة في المشاريع الراقية جدًا اللي بتستهدف الـ high-end market.
الشركة موجودة من أواخر التسعينات وبداية الألفينات، يعني عندها خبرة طويلة، وتركيزها الأساسي بيكون على الجودة العالية والخصوصية أكتر من الكمية والتوسع السريع، ودي أهم مشاريع الشركة:
قطامية هايتس (Qatameya Heights)
ده المشروع الأشهر والأقدم لقطامية ديفلوبرز، ويعتبر من أرقى الكمبوندات في مصر كلها مش بس التجمع الخامس.
الكمبوند مميز بالطابع الفريد، فهو مش كمبوند عادي فيه مئات العمارات، ده مجتمع صغير من الفلل والقصور الفاخرة، كمان موجود فيه فلل مستقلة بمساحات تبدأ من 500 متر وتوصل لـ 1500 متر، وقصور مميزة بتصميمات خاصة حديثة، والمشروع بيتميز بالحاجات دي:
- المرافق المميزة: المشروع فيه ملعب جولف 18 حفرة وده من أفضل ملاعب الجولف في مصر، ونادي رياضي واجتماعي راقي جدًا وحمامات سباحة متعددة ومطاعم فاخرة ونظام أمني متطور جدًا.
- المساحات الخضراء: الكمبوند حوالي 80% من مساحته عبارة عن مساحات خضراء، والكثافة السكانية قليلة جدًا، والمسافات بين الفلل بتكون كبيرة.
موقع قطامية هايتس
المشروع موجود على طريق القطامية ـ العين السخنة في قلب منطقة القطامية الراقية وقريب من الجامعة الأمريكية ومن قلب التجمع الخامس.
وبيستهدف رجال أعمال ومسؤولين كبار وعائلات ثرية بتبحث عن الرفاهية والخصوصية القصوى، عشان كده هو من أغلى الكمبوندات في مصر.
مميزات قطامية ديفلوبرز كمطور عقاري
الشركة بتدخل في مشاريع اقتصادية أو متوسطة كمان بتوفرلك جودة مميزة، ودي أهم المميزات:
- بستخدم خامات عالية الجودة سواء للرخام أو الباركيه أو الأبواب أو الشبابيك.
- الخصوصية والأمان، ودي من أهم ما يميز مشاريعهم، كمان الكثافة السكانية قليلة والمسافات بين الوحدات كبيرة، ونظام الأمان متطور جدًا.
4. هايد بارك للتطوير العقاري
هايد بارك من الشركات اللي غيرت مفهوم الكمبوندات في مصر، لأن تفكيرهم الأساسي هو إن الطبيعة والمساحات الخضراء لازم تكون أولوية مش إضافة.
الشركة بدأت من حوالي 15 سنة، وقدرت تبني سمعة قوية جدًا في فترة قصيرة، كمان الشركة جزء من مجموعة شركات الدكتور حسن علام، وده واحد من أكبر رجال الأعمال في مصر، ودي أهم مشاريع الشركة:
هايد بارك القطامية (Hyde Park New Cairo)
ده المشروع الرئيسي للشركة وواحد من أنجح المشاريع في التجمع الخامس بشكل عام، ودي أهم سماته:
- المشروع على مساحة حوالي 6 مليون متر مربع يعني 1400 فدان تقريبًا، و 75% من المساحة دي مساحات خضراء وبحيرات ولاندسكيب، و 25% بس مخصص للمباني.
- التصميم العام للمشروع مستوحى من Hyde Park في لندن، كمان فيه حديقة مركزية ضخمة جدًا، وكل الوحدات السكنية ليها ڤيو على مساحات خضراء.
- متوفر أنواع وحدات كتيرة زي شقق بمساحات من 100 متر لـ 300 متر ودوبلكس وبنتهاوس وتاون هاوس وتوين هاوس وفلل مستقلة.
- المرافق والخدمات كتيرة زي Business Park ودي منطقة أعمال متكاملة بمباني إدارية وعيادات ومحلات، ونوادي رياضية وحمامات سباحة أولمبية وحمامات للأطفال، ملاعب تنس وسكواش، مسارات للجري والدراجات بطول الكمبوند
- موجود مناطق مخصصة للـ BBQ والتجمعات العائلية وKids area وكافيهات ومطاعم داخل المساحات الخضراء
موقع هايد بارك القطامية
المشروع موجود على طريق القاهرة السويس بالقرب من الجامعة الأمريكية، وبعيد عن وسط القاهرة بحوالي 20 دقيقة، وبعيد عن العاصمة الإدارية بحوالي 15 دقيقة بس، وبالنسبة لحالة المشروع فأغلبه اتسلم وفيه آلاف من السكان.
مميزات هايد بارك كمطور عقاري
الشركة بتهتم بتطوير مشاريع سكنية تناسب كل الناس، ودي أهم مميزاتها:
- جودة البناء والتشطيب: هايد بارك بتهتم جدًا بجودة التنفيذ ويتكون الخرسانة من أفضل الأنواع والحديد والسباكة والكهرباء بمعايير عالية.
- التشطيبات كويسة جدًا: خصوصًا في الوحدات الحديثة، لأنهم بيستخدموا ماركات معروفة في السيراميك والأبواب والدهانات.
- الالتزام بالتسليم: هايد بارك عندها سجل جيد في التسليم.
- القيمة الاستثمارية العالية: العقارات في هايد بارك بتزيد في القيمة بمعدلات كويسة، والسبب الرئيسي في ده هو إن المشروع ناجح جدًا وفيه طلب عالي.
- أنظمة السداد المريحة: الشركة بتقدملك تسهيلات مميزة في الدفع، والتقسيط بيوصل لـ 8-10 سنين في كتير من المراحل، والمقدم كمان بيبدأ من 10%.
5. سوديك للتطوير والاستثمار العقاري
شركة سوديك (SODIC) واحدة من أعرق وأكبر شركات التطوير العقاري في مصر، واسمها اختصار لـ Sixth of October for Development and Investment Company.
سوديك اتأسست سنة 1996، يعني عندها أكتر من 25 سنة خبرة، والشركة مدرجة في البورصة المصرية، وليها مشاريع في مناطق مختلفة زي 6 أكتوبر والشيخ زايد والقاهرة الجديدة والساحل الشمالي. كمان سوديك معروفة بالتصميمات العصرية والجودة العالية والالتزام بالمواعيد، ودي أهم مشاريعها في التجمع الخامس:
ايستاون سوديك (Eastown SODIC)
ده المشروع الرئيسي لسوديك في القاهرة الجديدة، وواحد من أنجح مشاريعهم، ودي سماته الفريدة:
- الفكرة والتصميم: ايستاون مستوحى من المدن الأوروبية العصرية، وفكرته إنك تعيش في مكان صغير فيه كل حاجة مش مجرد كمبوند.
- التصميم المعماري مودرن جدًا: وموجود فيه خطوط clean وألوان neutral، كمان الشوارع واسعة ومرتبة بشكل جميل.
- المساحة: المشروع بيمتد على مساحة حوالي 860,000 متر مربع.
- أنواع الوحدات: متوفر فيه شقق سكنية ودوبلكس وتاون هاوس ومحلات ومكاتب تجارية.
- المرافق العديدة: زي المدارس وسوبر ماركت كبير (Spinneys) وجيم ونادي رياضي وحمامات سباحة ومساحات خضراء ومناطق للجلوس ومسجد.
موقع ايستاون سوديك (Eastown SODIC)
المشروعات موجود على امتداد شارع التسعين الجنوبي في قلب القاهرة الجديدة وقريب جدًا من الجامعة الأمريكية والجامعة الألمانية والتجمع الخامس.
بالنسبة لحالة المشروع، فهو اتسلم بالكامل تقريبًا وفيه ناس ساكنة من سنين، كمان المنطقة التجارية فيه شغالة ومزدحمة.
مميزات سوديك كمطور عقاري
دلوقتي هنتعرف على مميزات الشركة دي:
- الخبرة الطويلة والسمعة القوية: الشركة بقالها أكتر من 25 سنة في السوق، وليها عشرات المشاريع الناجحة، كمان عندها سجل مليان تقييمات جيدة من عملائها.
- الشركة مدرجة في البورصة، وده بيعني شفافية مالية وحوكمة.
- التصميمات العصرية المميزة: سوديك بتتعاون مع أفضل المكاتب الاستشارية المعمارية في العالم، عشان كده التصميمات بتاعتهم دايمًا عصرية وجذابة ومختلفة.
- الجودة العالية في التنفيذ: الشركة مش بتوفر في الخامات أو المقاولين، وعملية البناء بتكون بمعايير عالية جدًا.
- التنوع في المشاريع: الشركة عندها مشاريع في كل الفئات السعرية تقريبًا زي المشاريع الاقتصادية والمشاريع الفاخرة جدًا.
6. دريم تاون للتطوير العقاري
دريم تاون من الشركات الحديثة في السوق، لكنها قدرت تلفت الانتباه بمشاريع جيدة بأسعار تنافسية، كمان بتوفر مشاريع سكنية جيدة بأسعار بتتناسب الفئات المتوسطة، ودي أشهر مشاريع الشركة في التجمع الخامس:
دريم تاون التجمع الخامس
ده يعتبر المشروع الرئيسي للشركة في المنطقة، وفيه وحدات سكنية كتيرة زي شقق بمساحات تبدأ من 90 متر ودوبلكس وتاون هاوس صغيرة ومتوسطة.
كمان موجود في المشروع نادي رياضي واجتماعي وحمام سباحة ومناطق خضراء
كافيهات ومحلات صغيرةو أمن وحراسة، والمشروع بيركز على الشقق الصغيرة للشباب والمقبلين على الزواج.
مميزات دريم تاون كمطور عقاري
الشركة دي ليها مزايا تنافسية جداً لو اتقارنت بباقي الشركات، ودي أهم المميزات:
- الأسعار التنافسية: دي أكبر ميزة لدريم تاون إن الأسعار أقل بكتير من المنافسين الكبار، وده بيخليهم خيار جذاب للطبقة المتوسطة، فمثلًا سعر متر الشقة ممكن يكون أرخص بـ 30% من بالم هيلز أو سوديك.
- تسهيلات الدفع: أنظمة السداد في الشركة مرنة جدًا، لأن المقدم ممكن يكون 5% بس في بعض العروض، والتقسيط بيوصل لعشر سنين.
- الاستهداف الصح للسوق: دريم تاون فاهمة كويس إن في شريحة كبيرة من الناس عايزة سكن كويس بسعر معقول، مش luxury وده اللي بيحاولوا يقدموه دايما.
- الموقع الجيد: هتلاقي إن مشاريع دريم تاون موجودة في مواقع كويسة داخل التجمع الخامس، وقريبة من الخدمات والمحاور الرئيسية.
- فرصة للاستثمار بميزانية محدودة: فلو أنت مستثمر صغير أو متوسط وعايز تدخل سوق العقارات، الشركة هتبقى الأفضل ليك، لأن الوحدات بتتأجر بسهولة والعائد الإيجاري بيكون مقبول
مقارنة شاملة بين أفضل المطورين
دلوقتي بعد ما اتعرفنا على أفضل الشركات، خلينا نعمل مقارنة سريعة تساعدك تختار المناسب ليك من حيث عوامل كتيرة زي:
- السعر: لو عايز تتعامل مع مطور أسعاره عالية فممكن تلجأ لقطامية ديفلوبرز أو بالم هيلز أو سوديك، ولو سعر متوسط اختار هايد بارك أو المراسم، ولو بتدور على حاجة رخيصة لازم تلجأ لدريم تاون.
- الجودة: لو بتدور على جودة عالية فشركة بالم هيلز و سوديك و قطامية ديفلوبرز هيبقوا أفضل حاجة ليك.
- الالتزام بالتسليم: أكتر شركات ملتزمة بالتسليم في المعاد المطلوب هما سوديك وبالم هيلز
- الابتكار والتصميم: شركة المراسم هي الأكثر ابتكارًا، ولو بتدور على تصميمات عصرية فشركة هايد بارك بتوفرلك ده، ولو بتدور على تصميم كلاسيكي فشركة بالم هيلز هتبقى كويسة ليك.
نصايح عملية قبل الشراء
فيه شويه نصايح لازم تخلي بالك منها قبل ما تقرر تشتري وحدة من أي شركة عقارات، ودي أهمها:
1. زور المشاريع المسلمة
متكتفيش بزيارة الشو رووم أو المشروع وهو تحت الإنشاء، حاول تروح وتشوف مشروع متسلم من نفس الشركة من 3 سنين مثلاً، اتكلم مع السكان هناك، اسألهم عن تجربتهم لو الشركة سلمت في الميعاد أو لا، وهل جودة التنفيذ كانت كويسة ولا لا؟ وهل فيه مشاكل حصلت بعد الاستلام؟ واعرف منهم خدمة ما بعد البيع كانت إزاي؟
كمان حاول تشوف حالة المشروع دلوقتي عاملة ازاى، وهل الصيانة ماشية كويس؟ المساحات الخضراء محافظ عليها؟ الأمن شغال كويس؟
2. اقرأ العقد كويس
متوقعش على أي عقد قبل ما تقرأه كله وتحلله، ولو مش فاهم حاجة حاول تستعين بمحامي، كمان لازم تخلي بالك من تاريخ التسليم بالظبط، العقوبات على المطور لو اتأخر في التسليم، مواصفات التشطيب بالتفصيل، جدول الدفع لكل قسط وشروط الإلغاء واسترداد الأموال ونسبة الصيانة السنوية وإيه اللي بتغطيه، ولو فيه بنود غامضة قدامك أو بتحمي الشركة بس وملكش حقوق واضحة، فدي تعتبر علامة سيئة.
3. قارن بين 3 مشاريع على الأقل
ماتاخدش قرار سريع بعدما تشوف مشروع واحد عجبك، لازم تقارن بين 3-4 خيارات من شركات مختلفة، واعمل جدول مقارنة فيه السعر الإجمالي والمقدم والأقساط ومدة التقسيط وموعد التسليم والمساحة والخدمات المتاحة والموقع بالظبط وسمعة الشركة… المقارنة دي هتساعدك تاخد قرار مبني على حقايق مش عواطف.
4. احسب التكلفة الكاملة
سعر المتر مش كل حاجة لأن فيه تكاليف تانية زي تكاليف الصيانة السنوية ورسوم النادي وتوصيل المرافق زي الكهرباء والمياه والغاز ورسوم التسجيل والتوثيق والفرش والتشطيبات الإضافية لو الوحدة نص تشطيب، فخلي بالك إنك لا مش تحسب كل ده وتشوف الميزانية الكلية هتبقى قد إيه.
5. تأكد من التراخيص
اطلب من الشركة تشوفك رخصة البناء والموافقات الحكومية وتأكد إن المشروع قانوني 100%، لأن فيه مشاريع بدأت بدون تراخيص كاملة واتهدمت بعدين أو اتوقفت.
6. افهم السوق والمنطقة
لازم تدرس منطقة التجمع الخامس كويس وتعرف أسعار السوق الحالي وهل الأسعار بتزيد ولا بتنزل؟ والمشاريع الحكومية القريبة زي المدارس أو الطرق الجديدة، لأن كل ده بيأثر على قيمة استثمارك.
7. جرب خدمة العملاء
قبل ما تشتري تواصل مع خدمة عملاء الشركة أكتر من مرة واسأل أسئلة وشوف هيردوا إزاي، لو لاقيت الرد سريع واحترافي ومفيد فدي علامة كويسة، لكن لو صعب توصل لهم أو الرد سيئ فلازم تخلي بالك.
8. شوف خطط التطوير المستقبلية
حاول تسأل الشركة عن خططها المستقبلية في المشروع وهل فيه مراحل جديدة هتتضاف؟ أو فيه خدمات هتتبني قريب واعرف المشروع هيكتمل إمتى بالكامل، كل ده مهم عشان تعرف المشروع قرب يخلص ولا لا.
9. افحص الموقع بنفسك
روح المنطقة في أوقات مختلفة زي أيام الإجازات والصباح وبليل والضهر وشوف الزحمة على الطرق عاملة ازاى الضوضاء والخدمات القريبة زي المستشفيات والمولات والمدارس والمسافة من شغلك أو من أي أماكن بتحب بتروحها كتير ووسائل المواصلات اللي في المنطقة.
10. استشر خبير
لو قدرت تتكلم مع وسيط عقاري مستقل مش من الشركة نفسها أو خبير عقارات هيبقى أحسن ليك قبل الشراء، لأنهم هيقدروا يدوك رأي محايد ومعلومات عن السوق والشركات ماتعرفهاش.
التجمع الخامس منطقة مليانة فرص، والمطورين اللي اتكلمنا عنهم كلهم عندهم مشاريع قوية، اللي بيفرق بينهم هو إيه اللي يناسب احتياجاتك الشخصية وظروفك المادية.
في النهاية، العقار اللي هتشتريه النهاردة ممكن يكون بيتك اللي هتعيش فيه سنين، أو استثمارك اللي هيأمن مستقبلك المادي، فحاول تستثمر وقت كافي في البحث والمقارنة، لأن القرار الصح هيفرق معاك على المدى الطويل.
ولو محتاج مساعدة في اختيار المشروع المناسب اتواصل معانا وهنساعدك تاخد القرار الصح.
