لو بتفكر تسكن في التجمع الخامس أو حتى لو ساكن فيه فعلاً وعايز تعرف أماكن جديدة تخرج فيها مع عيلتك وأصحابك، فإنت في المكان الصح.
الحقيقة إن التجمع الخامس مش بس منطقة سكنية، ده مكان فيه حياة كاملة ومولات ضخمة وكافيهات ومطاعم مناسبة لكل الأذواق وسينمات وأماكن ألعاب للأطفال ونوادي رياضية واجتماعية.
في المقال ده هناخدك في جولة تفصيلية عن أفضل مولات التجمع الخامس، وهنعرفك على الأماكن الترفيهية المميزة، ونكشفلك الأسرار اللي خلت المنطقة دي الاختيار الأول لكتير من الناس.
أفضل مولات التجمع الخامس
لو محتاج ترفه عن نفسك أو تشتري كل احتياجاتك من مكان واحد، هتلاقي مجموعة كبيرة من مولات التجمع الخامس اللي بتوفر تجربة تسوق وترفيه كاملة، لأن فيها محلات وماركات عالمية وكافيهات ومطاعم وأماكن ترفيه للعيلة كلها، ودي أفضل المولات اللي ممكن تروحها في المنطقة:
1. كايرو فيستيفال سيتي مول (Cairo Festival City Mall)
المكان ده مش مجرد مول.. ده مدينة ترفيهية متكاملة على مساحة 3 مليون متر مربع، وفيه أكتر من 300 محل ومطعم وكافيه، يعني مهما كان ذوقك أو ميزانيتك هتلاقي حاجة تناسبك، فلو رايح كايرو فيستيفال، استعد إنك تقضي يوم كامل من غير ما تحس بالوقت.
مميزات كايرو فيستيفال سيتي مول
دلوقتي هنعرفك أبرز مميزات المول ده:
- ماركات عالمية مختلفة: المول فيه أكثر من 300 براند عالمي ومحلي زي Zara, H&M, Mango, Marks & Spencer, Nike, Adidas, Massimo Dutti.
- VOX Cinemas: السينما دي فيها صالة عرض سينمائي مجهزة بأحدث التقنيات زي IMAX و4DX وDolby Atmos عشان توفرلك تجربة ترفيهية متميزة.
- مناطق ترفيهية للأطفال: زي Magic Planet وKidZania Cairo، وده خلاه مدينة تعليمية تفاعلية للأطفال بشكل كبير.
- هايبر ماركت مميز: ومن أشهرهم كارفور لأنه على مساحة واسعة وبيوفرلك كل احتياجات المنزل.
- خيارات طعام متنوعة: المول فيه أكثر من 50 مطعم ومقهى عالمي ومحلي ومنهم مطاعم الفاست فود ومطاعم فاخرة.
- محل IKEA: وده فرع كامل لأثاث وديكور المنزل.
- Dancing Fountain: ودي نافورة راقصة فيها عروض موسيقية كل يوم بليل.
- مواقف سيارات كبير: وموجود أماكن باركينج واسعة ومكيفة على عدة مستويات.
- خدمات VIP: وصالات استقبال خاصة وخدمة Personal Shopper.
موقع المول وإزاي توصل ليه؟
المول موجود على طريق القاهرة – السويس في التجمع الخامس جنب كمبوند Cairo Festival City في القاهرة الجديدة القاهرة الجديدة، وممكن توصل للمول من الطرق دي:
- من الطريق الدائري: خد مخرج القاهرة الجديدة، وبعدها كمل في اتجاه التجمع الخامس، وهتوصل في حوالي 15 دقيقة تقريبًا.
- من مدينة نصر: امشي على طريق السويس الرئيسي في اتجاه القاهرة الجديدة، والمول هيكون على يمينك بعد كمبوند Hyde Park بحوالي 20 دقيقة.
- من مطار القاهرة: تقدر توصل في حوالي 20 دقيقة عبر طريق المطار ثم الطريق الدائري في اتجاه التجمع الخامس.
- من وسط القاهرة: الرحلة بتاخد تقريبًا من 35 لـ40 دقيقة عن طريق الأوتوستراد أو طريق صلاح سالم حسب حالة الزحمة.
ودي خريطة بتوضح الموقع التفصيلي لكايرو فيستيفال سيتي مول:
مواعيد عمل المول
المول بيستقبل الزوار من الساعة 10 صباحًا لحد الساعة 12 منتصف الليل من يوم الأحد إلى الخميس، لكن في أيام الجمعة والسبت ساعات العمل بتمتد شوية، وبيفضل المول مفتوح من 10 صباحًا لحد 1 بعد منتصف الليل، وفي الأعياد والمناسبات ساعات العمل ممكن تمتد لحد 2 بعد منتصف الليل حسب الزحمة والفعاليات.
2. مول بوينت 90 (Point 90 Mall)
المول ده موجود في قلب التجمع الخامس جنب الجامعة الأمريكية، وهو مصمم عشان يناسب أذواق الشباب والطلبة والعائلات اللي بتبحث عن تجربة تسوق مريحة وبعيدة عن الزحمة. كمان المول بيتميز بتصميمه العصري والأنيق وموجود فيه مساحات مفتوحة ومريحة، وبيوفرلك تشكيلة مميزة من الماركات الشبابية والكافيهات المعروفة، عشان كده أجواء المول مختلفة عن أي مول كبير.
مميزات مول بوينت 90
المول بيقدملك تجربة تسوق وترفيه متكاملة، ودي أهم مميزاته:
- سينما Cityscape Cinemas: السينما بتقدملك تجربة مشاهدة مريحة جدًا، وموجود فيها شاشات حديثة ومقاعد مريحة وخدمة VIP لو بتحب تجربة السينما الراقية.
- كافيهات معروفة: زي كافيه Beano’s وCilantro وStarbucks، ودول مناسبين لو حابب تشتغل شوية على اللابتوب أو تقعد مع أصحابك أو تعقد ميتينج بسيط.
- المطاعم المتنوعة: لو بتحب البرجر أو السوشي أو الأكل الشرقي والغربي، هتلاقي مطاعم كتيرة مناسبة ليك، زي Buffalo Burger وCook Door وMori Sushi وChili’s وغيرهم.
- محلات ملابس شبابية: زي LC Waikiki وPull&Bear وAmerican Eagle وDejavu، ودول بيوفروا ليك صيحات موضة حديثة بتكلفة بسيطة.
- تصميم واسع ومريح: المول فيه أماكن جلوس كتير تقدر ترتاح فيها.
- فعاليات وعروض موسيقية: بتخلي المول يكون مليان بأجواء مميزة وممتعة بالأخص في الويك إند.
- واي فاي مجاني موجود في أغلب أنحاء المول.
موقع المول وإزاي توصل ليه؟
المول موجود في شارع التسعين الشمالي بالتجمع الخامس، قدام الجامعة الأمريكية مباشرة، وده بيخليه سهل الوصول من معظم مناطق القاهرة الجديدة، وممكن توصل للمول من خلال الطرق دي:
- لو جاي من الطريق الدائري، ممكن تاخد مخرج التجمع الخامس وتتجه ناحية الجامعة الأمريكية، وهتلاقي المول على شارع التسعين في حوالي 20 دقيقة.
- أو من كايرو فيستيفال سيتي الطريق بياخد حوالي 10 دقايق بس من خلال شارع التسعين.
- من مدينة نصر تقدر توصل في حوالي 25 دقيقة عن طريق طريق السويس وبعدها تدخل التجمع.
ودي خريطة بتوضحلك موقع المول بشكل تفصيلي:
مواعيد عمل المول
المول مفتوح كل يوم من الساعة 10 صباحًا لحد 11:30 مساءً، وفي الجمعة والسبت ساعات العمل بتمتد لحد منتصف الليل، أما المطاعم والكافيهات فكتير منها بيكمل شغل لحد بعد منتصف الليل، والسينما بتفضل شغالة لحد آخر عرض تقريبًا في الساعة 1 صباحًا.
3. سيتي سنتر ألماظة (City Centre Almaza)
سيتي سنتر ألماظة يعتبر من أكبر وأشهر مولات شرق القاهرة، وموجود على طريق السويس وقريب جداً من مطار القاهرة وده خلي الوصول ليه سهل سواء كنت جاي من مدينة نصر أو التجمع أو مصر الجديدة.
المول تابع لمجموعة ماجد الفطيم، وده بيخلي تجربة التسوق منظمة ومريحة، لأنك هتلاقي كل حاجة في مكان واحد زي التسوق والأكل والسينما وترفيه للأطفال، كمان تصميم المول واسع وبيسهل الحركة حتى في أوقات الزحمة، وده بيخليه مناسب جدًا للعائلات والخروجات الطويلة.
مميزات سيتي سنتر ألماظة
المول ده بيوفرلك بعض المزايا الفريدة زي:
- كارفور ضخم: وده بيوفرلك كل احتياجات البيت سواء مواد غذائية أو أجهزة أو أدوات منزلية في نفس مكان.
- مدينة ألعاب Magic Galaxy: ومساحتها كبيرة ومليانة ألعاب إلكترونية وبولينج وأنشطة للأطفال.
- سينما حديثة: بتقدملك تجربة مشاهدة مريحة وجودة صوت وصورة ممتازة.
- محلات ملابس ورياضة متنوعة: زي Adidas وLC Waikiki وSplash وDecathlon.
- منطقة مطاعم واسعة: وفيها خيارات كتيرة أوى تناسب كل الأذواق، كمان موجود مطاعم عائلية معروفة زي Chili’s وBonanza وفلفلة.
- متاجرمتخصصة في مستلزمات الأطفال زي Mothercare.
- باركينج كبير ومجاني عشان يسهل عليك الدخول والخروج بدون مشاكل.
- خدمات مريحة لأسرتك زي غرف تغيير حفاضات وعربات تسوق للأطفال.
موقع المول وإزاي توصل ليه؟
المول موجود على طريق القاهرة – السويس، بالقرب من مطار القاهرة الدولي ودي أهم طرق الوصول ليه:
- المول بعيد عن مطار القاهرة الدولي بحوالي 5 دقايق بس.
- ممكن تروحه من مدينة نصر عبر طريق السويس.
- أو من وسط القاهرة عن طريق صلاح سالم.
ودي خريطة بتوضح الموقع بالتفصيل للمول:
مواعيد عمل المول
المول مفتوح كل يوم من الساعة 10 صباحًا لحد 12 منتصف الليل، أما السينما والمطاعم بتكمل لحد بعد منتصف الليل، وفي رمضان المواعيد بتمتد لحد 2:30 فجرًا.
4. مول داون تاون القطامية (Downtown Katameya)
مول داون تاون القطامية مختلف شوية عن المولات الكبيرة، لأنه مصمم عشان يوفر لك تجربة هادية، كمان مناسب للناس اللي بتحب الأماكن الراقية البعيدة عن الزحمة.
المكان مناسب ليك لو عايز خروجات هادية ومقابلات عمل وعشاء لطيف، كمان بيتميز بتصميمه العصري والمساحات المفتوحة والجلسات الخارجية المريحة.
مميزات مول داون تاون القطامية
المول بيقدملك مميزات كتيرة حقيقة، ودي أهمها إن موجود فيه مطاعم راقية بتوفر أكلات عالمية مشهورة وكافيهات هادية مناسبة للشغل أو الاجتماعات ومحلات ديكور وأثاث ومتاجر ملابس ومنتجات عالية الجودة، وباركينج منظم، وخدمات صف سيارات.
موقع المول وإزاي توصل ليه؟
مول داون تاون القطامية موجود داخل مشروع القطامية داون تاون على طريق القطامية ـ العين السخنة، وممكن توصل ليه عن طريق التجمع أو المعادي أو العاصمة الإدارية بمسافة حوالي نص ساعة بس.
والخريطة دي بتوضح عنوان المول:
مواعيد العمل في المول
المول بيعمل عادة من الساعة 10 صباحًا لحد 11 مساءً، وبالنسبة للمطاعم والكافيهات بتكمل لحد منتصف الليل تقريبًا، وفي رمضان بتمتد المواعيد لحد الساعة 1:30 صباحًا.
5. مول ميتينج بوينت (Meeting Point Mall)
المول ده من أقدم مولات التجمع الخامس، ولسه لحد دلوقتي واحد من الأماكن المفضلة لعائلات كتيرة، لأنه بسيط وعملي وكل الخدمات فيه قريبة وسهلة، كمان المكان مناسب ليك جدًا لو بتحب الخروجات بالذات مع وجود خدمات كتيرة للأطفال وأماكن جلوس مريحة.
مميزات مول ميتينج بوينت
المول كل شيء مصمم فيه عشان يناسب الكبار والصغار، ودي مميزاته:
- Fun Zone: ودي منطقة ألعاب آمنة للأطفال من سن سنة لـ 12 سنة.
- محلات ملابس أطفال: وأشهرها Mothercare,Chicco, Mamas & Papas.
- هايبر ماركت Spinneys عشان يوفرلك طعام طازج.
- مطاعم عائلية معروفة: زي Chili’s, TGI Friday’s, وأبو شقرا.
موقع المول وإزاي توصل ليه؟
مول ميتينج بوينت موجود في شارع التسعين الشمالي بجوار نادي الزهور في التجمع الخامس، وممكن توصل ليه بسهولة من الطريق الدائري أو من أي مكان في التجمع في دقايق.
ودي خريطة بتوضحلك المكان الدقيق المول في التجمع الخامس:
مواعيد عمل المول
المول مفتوح كل يوم من الساعة 10 الصبح لحد الساعة 11 مساءً، والمطاعم بتكمل غالبًا لحد منتصف الليل.
6. كونكورد بلازا مول (Concord Plaza Mall)
مول كونكورد بلازا موجود خلف كمبوند المصراوية في القاهرة الجديدة، وبيخدم السكان بشكل أساسي، عشان كده مناسب للمشاوير السريعة والاحتياجات اليومية من غير زحمة المولات الكبيرة.
مميزات كونكورد بلازا مول
المول موجود فيه مميزات كتيرة زي:
- موجود سوبر ماركت كبير لاحتياجاتك اليومية وصيدليات ومتاجر خدمية.
- متوفر مطاعم أسماك وكافيهات معروفة.
- أماكن ترفيه بسيطة للشباب ومحلات ملابس وخدمات متنوعة، كمان موجود باركينج مجاني وسهل.
موقع المول ومواعيد عمله
المول موجود على شارع التسعين الجنوبي في قلب القاهرة الجديدة، وقريب من البوابة الرئيسية، وسهل الوصول إليه من أي حي في المدينة، ومواعيد عمل المول بتبدأ من الساعة 10 صباحًا حتى 11 مساءً، والمطاعم بتكمل لحد منتصف الليل تقريبًا.
ودي خريطة بتعرفك الموقع التفصيلي للمول:
8. جاليريا مول
المول ده من أبسط المولات الموجودة في شارع التسعين، وبيخدم سكان المنطقة والمكاتب والشركات القريبة منه، كمان المول مش من النوع الضخم، لكنه مناسب للمشاوير السريعة أو لو بتدور على قعدة هادية في كافيه أو مطعم بدون زحمة المولات الكبيرة.
المكان بيجمع بين المطاعم والكافيهات وبعض المحلات والخدمات، ، وده خلاه مناسب لو عايز تخرج في مشوار خفيف أو مقابلة شغل أو قعدة هادية مع أصحابك.
موقع المول وإزاي توصل ليه؟
المول موجود في شارع التسعين الجنوبي بالتجمع الخامس في القاهرة الجديدة، وقريب من عدد كبير من الشركات والمكاتب الإدارية، وممكن توصل ليه من الطريق الدائري أو من الجامعة الأمريكية.
ودي خريطة بتعرفك على موقع المول بشكل تفصيلي:
أفضل الأماكن الترفيهية في التجمع الخامس
التجمع الخامس فيه أماكن ترفيهية كتير تستاهل إنك تزورها، ودي أشهر الأماكن الترفيهية بالمنطقة:
- الحديقة المركزية: ودي من أجمل الأماكن اللي تقدر تقضي فيها وقت مع عيلتك، لأن فيها مساحات خضراء واسعة جداً وأشجار وزهور ومناطق مخصصة للأطفال، وممرات مخصصة للمشي والجري.
- Magic Planet: في كايرو فيستيفال سيتي، ويعتبر من أكبر أماكن الألعاب للأطفال في مصر، لأن فيه كل أنواع الألعاب الإلكترونية والحركية وألعاب الفيديو.
- Fun City: ودي سلسلة أماكن ألعاب منتشرة في مولات مختلفة في التجمع، زي كونكورد بلازا، ولألعاب فيها متنوعة ومناسبة للأطفال من سن 3 لحد 12 سنة تقريباً.
- Pump It Up: المكان ده مخصص للنط والألعاب الحركية، لأن فيه قلاع نطاطة ضخمة ومتاهات وألعاب تحدي، ومناسب لحفلات أعياد الميلاد، لأنهم بيقدموا باكدجات شاملة للحفلات.
- كيدزانيا: المدينة دي ترفيهية ومصممة للأطفال اللي سنهم بيتراوح بين سنتين لحد 14 سنة، لأنها بتقدم ليهم أكثر من 80 نشاط مختلف.
- نيو كايرو بارك: ودي موجودة في الكيلو 32 على طريق السويس، وبتركز على تقديم أنشطة مدرسية ورحلات مختلفة، زي رحلة لحديقة الحيوان وأنشطة ركوب الخيل وبيت الزواحف.
- حديقة الأسرة: الحديقة دي تعتبر من أكبر الوجهات الترفيهية اللي ممكن تزورها مع عيلتك، وموجودة على طريق السويس، ومميزة بالبيئة الخضراء الواسعة، كمان بتوفرلك جلسات تصوير وأماكن لركن السيارات
- قرية فجنون: تعتبر من أفضل المراكز الترفيهية والثقافية في المنطقة، وبتوفرلك أنشطة مختلفة زي الحرف اليدوية والأنشطة الحركية.
أشهر كافيهات Rooftop في التجمع الخامس
الكافيهات اللي على الأسطح بقيت منتشرة في التجمع، ودي أشهر كافيهات Rooftop:
The Roof
ده من أشهر كافيهات الروف توب في التجمع، لأن فيه إطلالة رائعة على المنطقة والأجواء هادية جداً، والمكان مناسب للقعدات الرومانسية أو مع الأصحاب، كمان المنيو متنوع، لأنهم بيقدموا المشروبات الساخنة والباردة والأكل الخفيف والحلويات.
Cloud 9
كافيه cloud 9 ده عصري ومناسب للشباب، ومميز بأجوائه الحيوية والموسيقى العالية، كمان بيعمل فعاليات وحفلات في نهاية الأسبوع، والمنيو فيه مشروبات وأكلات لذيذة كمان أسعاره متوسطة وديكوره مودرن، وده خلاه مناسب للتجمعات والاحتفالات.
كل الأماكن دي بتقدم ليك تجربة مختلفة مع إطلالات جميلة على التجمع والقاهرة الجديدة، خصوصاً في المغرب والليل.
أفضل نوادي التجمع الخامس
النوادي في التجمع الخامس مش بس للرياضة، دي بتكون أماكن اجتماعية متكاملة ومناسبة للعائلات، ومن أشهر النوادي دي الآتي:
1. نادي الشمس (Al Shams Sporting Club)
النادي ده من أقدم وأعرق النوادي في التجمع الخامس، وعنده قاعدة أعضاء كبيرة جداً، ودي مميزاته:
- فيه ملاعب رياضية متنوعة، من كرة القدم والسلة للتنس والسكواش..الملاعب مجهزة كويس ومتاحة للحجز طول الأسبوع، كمان فيه أكاديميات رياضية للأطفال والكبار.
- حمامات السباحة في النادي كبيرة ونضيفة، كمان موجود حمام للكبار وحمام للأطفال، وفي الصيف بيبقوا مزحومين جداً.
- صالات رياضية حديثة ومجهزة بأحدث الأجهزة، وفيه مدربين محترفين.
- المطاعم والكافيهات في النادي بتقدم خدمة كويسة، وفيه أماكن للجلوس والاسترخاء بعد الرياضة، كمان النادي بيعمل أنشطة اجتماعية وفعاليات، خصوصاً في المناسبات والأعياد.
- منطقة الألعاب للأطفال واسعة وآمنة، والأطفال بيحبوها جداً، والنادي كمان فيه مساحات خضراء وأماكن للمشي والجري.
لو عايز نادي عائلي شامل فيه كل الأنشطة، فنادي الشمس هيبقى خيار ممتاز ليك، مشكلته بس إن الاشتراك مش رخيص لكن النادي بيقدم قيمة كبيرة مقابل الفلوس، والعضوية فيه بتديك وبتدي عيلتك فرصة تمارس الرياضة وتتعرف على ناس جديدة.
2. نادي وادي دجلة (Wadi Degla Club)
وادي دجلة من أكبر وأشهر النوادي الرياضية في مصر، وفيه فرع مميز في منطقة القطامية وقريب من التجمع الخامس ومميز بالآتي:
- النادي معروف بالاحترافية العالية في كل حاجة، من التجهيزات الرياضية للمدربين والبرامج التدريبية، كمان فيه فروع متعددة في القاهرة، وده بيديك مرونة إنك تروح أي فرع عايزه.
- التجهيزات الرياضية في وادي دجلة على أعلى مستوى والملاعب والصالات الرياضية والحمامات كلها حديثة ومجهزة بأحدث المعدات، كمان في مدربين محترفين وعندهم شهادات دولية.
- البرامج الرياضية في النادي متنوعة جداً زي كرة القدم والسلة والسباحة واليوجا والزومبا، كمان فيه برامج خاصة للأطفال والشباب، زي الأكاديميات الرياضية والمعسكرات الصيفية.
عشان كده لو إنت جاد في الرياضة وعايز نادي احترافي يساعدك توصل لأهدافك، نادي وادي دجلة هيبقى الاختيار الأمثل ليك، كمان لو عايز أطفالك يتدربوا بشكل احترافي، وادي دجلة عنده برامج ممتازة لده.
التجمع الخامس مش مجرد منطقة سكنية فاخرة، ده نمط حياة متكامل بيجمع بين الرفاهية والأمان والترفيه في مكان واحد… من مولات كايرو فيستيفال سيتي العملاقة اللي بتقدم تجربة عالمية، لـ بوينت 90 اللي بيناسب الشباب، ومن نوادي وادي دجلة الفخمة لكافيهات الروف توب الرومانسية، كل حاجة في المنطقة مصممة علشان تخليك تعيش حياة أفضل وأكثر راحة.
سواء كنت ساكن في التجمع أو بتفكر تنتقل ليه، أو حتى بس جاي من منطقة تانية وعايز تقضي يوم مميز، دلوقتي عندك الدليل الشامل اللي هيوديك لأفضل الأماكن وأحلى التجارب، لأن المولات هنا مش بس للتسوق، دي أماكن ممكن تقابل فيها عيلتك أو أصدقائك، ولو عندك أي سؤال أو عايز تعرف تفاصيل أكتر عن أي مول أو منطقة، متترددش إنك تتواصل معانا.
