عالم المدارس كبير والبحث عن مدرسة مناسبة لأولادك محتاج جهد ؟
بتدور على مدرسة خاصة لأولادك في التجمع الخامس ومش عارف توصل لكل المدارس وموصفاتها؟
يبقا المقال ده هو الحل اللي هيساعدك تقرر أفضل بيئة تعليمية لأولادك في التجمع الخامس.
التجمع الخامس يعتبر من أهم وأكبر المجتمعات في القاهرة الجديدة، واللي بتضم تنوع مميز في المنشئات التعليمية. ومن خلال المقال ده هتقدر تتعرف على أفضل المدارس الخاصة الموجودة في التجمع الخامس سواء كانت:
مدارس خاصة لغات.
معاهد أزهرية خاصة.
وهنوضح بالتفصيل مواصفات كل مدرسة ومعلومات مهمة عنها زي موقعها، سن القبول فيها، مصروفاتها، او نظامها التعليمي.
أنواع المدارس الخاصة في التجمع الخامس
المدارس الخاصة في التجمع الخامس بتتميز بكونها بيئة تعليمية خصبة بتاسعد على تدريس المناهج المصرية وبتدعمها بمناهج إضافية تزيد قوتها وتخرج بيها جيل واعي ومدرك لكل التفاصيل اللي بيدرسها، وبتساعد الطلاب على اكتشاف انفسهم سواء في الجانب الأكاديمي، أو على مستوى الأنشطة الأخرى، زي الأنشطة الرياضية والثقافية. وبتكون معتمدة من وزارة التربية والتعليم المصرية وبتخضع لقوانينها.
بتنقسم المدارس الخاصة في التجمع الخامس ل 3 أقسام:
مدارس خاصة لغات ناشونال.
مدارس خاصة فيها قسم ناشونال وقسم انترناشونال.
معاهد أزهرية.
المدارس الخاصة الناشونال في التجمع الخامس:
مدرسة سكاي لاين للغات القاهرة الجديدة Skyline language School New Cairo
مدرسة سكاي لاين للغات في التجمع الخامس تعتبر من أميز المدارس اللي تحب أولادك يلتحقوا بيها. بدأت المدرسة أول سنة ليها في العام الدراسي 2020-2021. وقدرت تحقق نجاح ملحوظ في الأجيال اللي اتخرجت منها.
المدرسة موجودة في منطقة اللوتس الشمالية، واللي تعتبر منطقة أهلية آمنة جدًأ تقدر تكون مطمئن على ولادك فيها. وتقدر تشوف موقعها بالتحديد من هنا.
مدرسة سكاي لاين للغات بتدرس منهج الثانوية العامة المصرية باللغة الإنجليزية، وبتوفر معاه لغات ثانية زي الألماني والفرنسي بيتم تدريسهم من الصف الأول.
سن القبول في مدرسة سكاي لاين للغات في القاهرة الجديدة هو:
سنتين و6 شهور في مرحلة التمهيدي
و3 سنين و6 شهور في مرحلة الحضانة.
وبيبدأ فيها التقديم في شهر ديسمبر، وبتكون كثافة الفصول فيها حوالي 25 طالب بحد أقصى.
رسوم التقديم في مدرسة سكاي لاين للغات بتكون 1500 جنيه مصري، أما المصروفات ف بتكون متغيرة كل سنة من الوزارة.
مدرسة ال ياسر للغات Al Yasser Language School – YLS
مدرسة ال ياسر للغات موجودة في شارع التسعين في التجمع الخامس، والمعروف عن شارع التسعين حيويته، ووجود مؤسسات تعليمية كتير فيه، مدرسة ال ياسر موقعها امام جامعة المستقبل وتقدر تعرف عنه بالتفصيل من هنا.
من أهم مميزات مدرسة ال ياسر للغات في التجمع الخامس انها بتهتم بالجانب الشخصي للطلاب مع الجانب الأكاديمي، وبتنمي مهاراتهم على الأصعدة المختلفة.
سن القبول في مدرسة ال ياسر للغات هو:
3 سنين لمرحلة التمهيدي.
3 سنين و 6 شهور لمرحلة الحضانة.
وبيبدأ التقديم في مدرسة ال ياسر للغات في شهر ديسمبر. مدرسة ال ياسر للغات بتدرس مناهجها باللغة الانجليزية، وبتبدأ مصروفاتها من 16 الف جنيه مصري.
مدرسة الريتاج للغات Al Retaj Language School
مدرسة الريتاج للغات من أفضل المدار الخاصة في التجمع الخامس وأهم مميزاتها هو موقعها الاستراتيجي في التسعين الجنوبي واللي بيخليها سهلة الوصول ليها وبيقربها من مجمعات سكنية معروفة زي:
كمبوند جنتي.
كمبوند سمارت لايف.
كمبوند زيزينيا.
ووجود المدرسة بالقرب من مجمعات سكنية معروفة ومأهولة بالسكان هيخليك مطمئن أكتر على أولادك أثناء تواجدهم فيها، وتقدر تعرف بالتفصيل عن موقع مدرسة الريتاج الخاصة من هنا.
بدأت المدرسة اول عام دراسي ليها في 2008، وبتدرس مناهج الثانوية العامة المصرية في قسمين، قسم عربي وقسم لغات. وبتستقبل مدرسة الريتاج طلابها من سن:
3 سنين في مرحلة التمهيدي.
4 سنين في مرحلة الحضانة.
مدرسة الريتاج الخاصة فيها فصول لذوي الاحتياجات الخاصة واللي بتقدم لهم في المناهج والجزء الأكاديمي بما يتناسب مع مهاراتهم وتساعدهم على التميز. أما عن مصروفات مدرسة الريتاج فبتبدأ من 31 الف جنيه مصري غير شاملة رسوم التقديم.
مدرسة انسباير للغات القاهرة الجديدة Inspire Language Schools New Cairo
مدرسة انسباير للغات في التجمع الخامس تأسست سنة 2019 وبدأت تخرج أجيال متفوقة على المستوى الشخصي والأكاديمي. موقعها في منطقة أبو الهول خلاها قريبة من مجمعات سكنية زي جاردينيا هايتس، وقريبة من المدرسة اليابانية، وتقدر تعرف اكتر عن موقع مدرسة انسباير من هنا.
مدرسة انسباير الخاصة في التجمع الخامس بتدرس منهج الثانوية العامة المصرية باللغة الانجليزية، وبتدرس لغات ثانية للطلاب بداية من الصف الأول زي:
اللغة الألمانية.
اللغة الفرنسية.
مدرسة انسباير الخاصة للغات بتقبل الأطفال في مرحلة الحضانة من سن 3 سنين و6 شهورن وبيبدأ التقديم فيها من شهر يناير، وبتحافظ المدرسة على قلة الكثافة في الفصول بمعدل 25 طالب كحد أقصى. أما عن مصروفات مدرسة انسباير للغات في التجمع فبتبدأ من 21 ألف جنيه مصري.
مدرسة أجيال المتكاملة للغات Agyal Integrated Language School
مدرسة أجيال المتكاملة للغات في التجمع الخامس بموقعها في الحي الأول قربها جدًا من أهم الشوارع الرئيسية، المدرسة قريبة جدًا من محكمة الأسرة ومن التسعين الجنوبي وبالتالي هتوصل لها بسهولة دايمًا، وتقدر تعرف موقعها بالتفصيل من هنا.
اتأسست مدرسة أجيال المتكاملة سنة 1998 وبدأت مشوارها في التطوير على مدار السنين. وقدرت توصل لمستوى يثق فيه الآباء ويخلوا أبناءهم يلتحقوا بيها عن اقتناع.
في مدرسة أجيال المتكاملة بيتم تدريس مناهج الثانوية العامة المصرية باللغة الانجليزية، بالإضافة لاختيار الطالب لغة ثانية من ألماني أو فرنسي وبيدرسهم من الصف الأول.
سن القبول في مدرسة أجيال المتكاملة في التجمع الخامس هو:
سنتين و6 شهور لمرحلة التمهيدي.
3 سنين و 6 شهور لمرحلة الحضانة.
وبيبدأ التقديم للعام الدراسي الجديد في شهر ديسمبر. أما عن مصروفات مدرسة أجيال المتكاملة ف بتبدأ من 23 الف جنيه مصري.
مدرسة ليدرز للغات Leaders Language School
مدرسة ليدرز الخاصة للغات في التجمع الخامس من أفضل المدارس من حيث موقعها، لأنها قريبة من كمبوندات كتير في قلب التجمع زي:
كمبوند الجزيرة.
كمبوند الزهوة.
كمبوند الريتاج.
كمبوند قطامية بالمز.
كمبوند المصراوية.
كمبوند جراند ريزيدنس.
كل المجمعات السكنية دي بالقرب من مدرسة ليدرز للغات بتديها أفضلية من حيث استراتيجية الموقع اللي ممكن يكون أقرب ما يكون من بيتك. وممكن تعرف اكتر عن موقع مدرسة ليدرز للغات من هنا.
مدرسة ليدرز للغات بتدرس منهج الثانوية العامة المصرية باللغة الإنجليزية، وبتتيح تدريس لغة ثانية بيختارها الطالب بين الألماني أو الفرنسي. أما عن سن القبول في مدرسة ليدرز للغات بيكون:
4 سنين لمرحلة التمهيدي.
5 سنين لمرحلة الحضانة.
كثافة الفصول في مدرسة ليدرز للغات بتكون حوالي 20 طالب بحد أقصى. وبيبدأ التقديم للعام الدراسي الجديد من شهر مايو لحد اكتمال العدد المطلوب في كل مرحلة.
مصروفات مدرسة ليدرز للغات في التجمع بتبدأ من 50 ألف جنيه مصري غير شاملة رسوم الباص.
عن مدرسة الفارابي للغات Al-Farabi Language School
لو حابب أولادك يلتحقوا بمدرسة تخليهم على قدر عالي من الوعي والثقافة بجانب المستوى الأكاديمي المميز فاختيارك هيكون لمدرسة الفارابي للغات في التجمع الخامس.
مدرسة الفارابي للغات موجودة في الحي الرابع، المجاورة الخامسة، وتقدر تشوف موقعها بالتفصيل من هنا.
مناهج مدرسة الفارابي للغات هي مناهج الثانوية العامة المصرية واللي بتدرسها باللغة الانجليزية وبتضيف عليها لغات ثانية زي الألماني والفرنسي.
سن القبول في مدرسة الفارابي للغات التجمع الخامس هو:
3 سنين و 10 شهور في مرحلة التمهيدي.
4 سنين و 10 شهور في مرحلة الحضانة.
وبيبدأ التقديم في مدرسة الفارابي بالتجمع الخامس من شهر نوفمبر وبيستمر لحد شهر مايو. وبتبدأ مصروفات مدرسة الفارابي التجمع الخامس من 31 الف جنيه مصري.
النوع الثاني: مدارس خاصة فيها قسم ناشونال وقسم انترناشونال
من مدارس التجمع الخامس الخاصة مدارس انترناشونال أو دولية وبتحتوي على قسم ناشونال، واتكلمنها عنهم بالتفصيل في دليل لأفضل المدارس الدولية في التجمع الخامس، تقدر تعرف عنه أكتر وبالتفصيل عن كل مدرسة من هنا. ومن المدارس اللي فيها قسم دولي وقسم محلي في التجمع الخامس:
مدرسة قايتباي للغات.
مدرسة مانور هاوس.
المدرسة المصرية للغات – قطامية.
مدرسة اخناتون.
مدرسة التربية الحديثة.
مدرسة مصر الحديثة 2000.
معاهد أزهرية خاصة في التجمع
معاهد الكمال الازهرية للغات: Al Kamal Azharian Language Institutes
معاهد الكمال الأزهرية هتكون وجهتك المناسبة لو بتدور لأولادك على مدرسة بنظام التعليم الأزهري عشان تساعدهم على زيادة المعرفة الدينية وممارسة القيم الإسلامية بشكل يومي ومستمر.
موقع معاهد الكمال الأزهرية في التجمع الخامس موقع مميز في الحي الثالث، المنطقة الأولى، خلف مسجد فاطمة الشربتلي. وتقدروا تعرفوا عن موقعها بالتفصيل من هنا.
معاهد الكمال الأزهرية بتدرس منهج الثانوية الأزهرية وبتتيح تدريس لغات ثانية زي الألمانية والفرنسية، وبتهتم بتحفيظ 3 أجزاء من القرآن الكريم سنويًا. بالإضافة لاعتمادها من الهيئة القومية لضمان جودة التعليم والاعتماد.
معاهد الكمال الأزهرية الخاصة في التجمع الخامس بتوفر فصول مونتيسوري وفصول بالنظام ال semi-american وبتكون كثافة فصول المونتيسوري 12 طالب، وكثافة الفصول العادية 20 طالب بحد أقصى. أما عن مصروفات معاهد الكمال الأزهرية في التجمع الخامس بتبدأ من 22 الف و 400 جنيه مصري.
معهد الغد المشرق الأزهرى Alghad Al-Moshreq Azharian Institute – GMI
معهد الغد المشرق الأزهري من المؤسسات التعليمية الناجحة في التجمع الخامس واللي بتعمل على تطوير عقلية الطلاب وتحفيزهم المستمر وترسيخ القيم الإسلامية عندهم من أول يوم.
معهد الغد المشرق موجود في الحي الثاني المحلية الرابعة، موقع مميز تقدر تعرف عنه بالتفصيل من هنا.
معهد الغد المشرق الأزهري في التجمع الخامس بيدرس منهج الثانوية الأزهرية باللغتين الانجليزية والعربية وبيتيح لغات ثانية زي الألمانية والفرنسية بيتم تدريسهم من الصف الثالث.
سن القبول في معهد الغد المشرق الأزهري بيبدأ من 3 سنوات و 6 شهور لمرحلة الحضانة، وبيبدأ التقديم في شهر ديسمبر. أما عن المصروفات فبتبدأ من 25 الف جنيه مصري.
معاهد البخاري الأزهرية للغات Albukhary Azharian Language Institutes
معاهد البخاري الأزهرية موجودة في الحي الثالث، المنطقة الخامسة، قريبة جدًا من محكمة القاهرة، موقع استراتيجي وآمن تمامًأ، تقدر تعرف عنه أكتر من هنا.
معاهد البخاري بتدرس منهج الثانوية الأزهرية باللغة الانجليزية والعربية، وبتتيح دراسة اللغة الفرنسية كلغة ثانية، بيتم تدريسها من الصف الرابع. وبتبدأ معاهد البخاري استقبال الطلاب من سن 3 سنين و6 شهور لمرحلة الحضانة، بكثافة فصول حوالي 28 طالب بحد أقصى.
بيبدأ التقديم في معاهد البخاري في التجمع الخامس في شهر ديسمبر، وبتبدأ مصروفاتها من 23 الف و 500 جنيه مصري.
وبعد م اتكلمنا عن أفضل المدارس الخاصة في التجمع الخامس وأهم مواصفاتها هتقدر بكل سهولة تختار أنسب مدرسة لأولادك، واللي ممكن تكتشف انها الأقرب لبيتك من خلال المقال ده. وهتقدر تحدد ترتيب المدارس بالنسبة لك من حيث مناسبتها ليك ولظروفك الحياتية والنظام التعليمي اللي حابب أولادك يتلقوه.
