لو إنت واقف دلوقتي قدام قرار شراء وحدة في كمبوند، وسمعت من المسوق إن فيه رسوم صيانة شهرية واشتراك كلوب هاوس، ومش فاهم يعني إيه ولا هتدفع كام بالضبط كل شهر، فإنت هنا في المكان الصح.
كتير من العملاء اللي بنقابلهم بيركزوا على سعر المتر وقسط الشقة، وبعدين يتفاجئوا بعد ما يستلموا إن فيه مصاريف شهرية ثابتة محدش وضحهالهم من الأول، والمشكلة مش في وجود المصاريف دي، لأنها فعلاً بتقدم خدمات حقيقية، المشكلة إنك لازم تحسبها قبل ما تقرر، مش بعد ما توقع.
عشان كده في المقال ده، هنفهمك بوضوح يعني إيه بالظبط Maintenance و Clubhouse وايه اللي بتشمله وإزاي تحسبهم صح وإمتى يكونوا استثمار يستاهل وإمتى لا.
يعني إيه بالظبط رسوم الـMaintenance في الكمبوندات؟
رسوم الصيانة (Maintenance Fees) دي ببساطة فلوس بتدفعها بشكل دوري، غالباً كل 3 شهور أو كل سنة مقابل إن الكمبوند يفضل نضيف وآمن ومنظم، كمان الرسوم دي مش فلوس على الفاضي زي ما بعض الناس بتفتكر، لأنها بتضمن ليك:
- نضافة الشوارع والمساحات الخضراء: بالاستعانة بعمال النضافة وري الزرع وقص الحشائش.
- أمن وحراسة 24 ساعة: بتغطية فريق الأمن واركيب كاميرات المراقبة في كل أنحاء المنطقة وبوابات إلكترونية.
- صيانة المرافق المشتركة: زي تصليح الأنوار الموجودة في الشوارع وصيانة المصاعد في البرج، وضمان نضافة المداخل.
- إدارة النفايات: من خلال جمع القمامة كل يوم والتخلص منها.
- صيانة حمامات السباحة والحدائق المشتركة: وده لو كانت موجودة في المشروع.
تكلفة الـMaintenance بتكون قد ايه؟
في مصر هتلاقي إن متوسط رسوم الصيانة بيتراوح ما بين 6 إلى 15 جنيه للمتر الواحد كل شهر وده بيعتمد على حسب مستوى الكمبوند والخدمات.
يعني لو عندك شقة 100 متر في كمبوند متوسط، هتدفع رسوم صيانة حوالي 600 – 800 جنيه كل شهر يعني من 7,200 – 9,600 كل سنة.
لكن لو في كمبوند راقي زي لاش فالي أو ماونتن فيو ممكن توصل لـ1,200 – 1,500 جنيه كل شهر يعني من 14,400 – 18,000 في السنة، وخلي بالك إن الأرقام دي بتزيد مع الوقت، لأن الشركات بتعمل زيادة بنسبة التضخم وبتكون حوالي 7% كل سنة.
يعني ايه الـClubhouse ؟
الـClubhouse مش مجرد نادي في الكمبوند، ده عبارة عن مركز ترفيهي متكامل فيه خدمات حصرية للسكان، وبيكون ليه رسوم منفصلة عن الصيانة، والكلوب هاوس بتلاقي فيه جيم مجهز بأحدث الأجهزة وحمامات سباحة خاصة غير المسابح العادية الموجودة في الكمبوند، وملاعب تنس وإسكواش وباسكت، وسبا وساونا وكافيهات ومطاعم داخلية وقاعات اجتماعات وفعاليات ومنطقة ألعاب أطفال مغطاة.
كم رسوم الكلوب هاوس؟
الموضوع هنا مختلف شوية، لأن في نوعين من الرسوم دي:
1. رسوم العضوية (Membership Fee)
دي بتدفعها مرة واحدة عند الاستلام أو بعدها بفترة قصيرة، بتتراوح ما بين 50,000 إلى 150,000 جنيه حسب الكمبوند، وفي بعض المشاريع بتكون إجبارية، وفي مشاريع تانية بتكون اختيارية
2. الاشتراك السنوي
دي فلوس سنوية بتدفعها عشان تستخدم الكلوب براحتك، ودي بتتراوح ما بين 10,000 إلى 30,000 جنيه كل سنة، وممكن تكون للوحدة كلها أو لكل فرد في العيلة.
يعني مثلاً لو إنت في مشروع زي لاش فالي، رسوم العضوية بتكون حوالي 100,000 جنيه لمرة واحدة، ورسوم الاشتراك السنوي بتكون حوالي 18,000 جنيه، ورسوم الصيانة الشهرية بتكون حوالي 12 جنيه للمتر يعني حوالي 1,200 جنيه للشقة اللي مساحتها 100 متر.
هل رسوم الكلوب هاوس إجبارية ولا اختيارية؟
الإجابة هنا بتعتمد على حسب المشروع، ففي مشاريع بتخليها اختيارية تماماً يعني لو مش عايز تشترك عادي ومش هتدفع حاجة، بس طبعاً مش هتقدر تستخدم الكلوب، وفي مشاريع تانية بتكون شبه إجبارية، بمعنى إنهم بيفرضوها على كل الوحدات في مراحل معينة من المشروع.
عشان كده قبل ما توقع أي عقد لازم تسأل عن رسوم الكلوب هاوس إذا كانت اختيارية ولا إجبارية، وعشان تعرف هل عادي تستخدم الخدمات من غير اشتراك سنوي؟ وهل ممكن تلغي العضوية بعد فترة ولا لا؟
إزاي تحسب إجمالي تكاليف الـMaintenance والـClubhouse قبل الشراء؟
خلينا ناخد مثال عملي عشان الصورة تكون واضحة معاك، لو إنت اشتريت شقة 120 متر في التجمع الخامس، وسعرها 3 مليون جنيه، والمقدم 10% يعني حوالي 300,000 جنيه، والقسط الشهري لمدة سبع سنين حوالي 32,000 جنيه، فرسوم الصيانة الشهرية هتكون 1,200 جنيه يعني هتدفع 10 جنيه للمتر الواحد، ورسوم عضوية الكلوب هتكون 80,000 جنيه لو لمرة واحدة، ورسوم الاشتراك السنوي في الكلوب هتكون 15,000 جنيه، يعني إجمالي المصاريف الشهرية الثابتة هيكون 34,450 جنيه، وإجمالي المصاريف السنوية بعد سداد الشقة هيكون حوالي 29,400 جنيه شاملة رسوم الصيانة والكلوب.
عشان كده خلي بالك إنك مش بس بتشتري شقة بـ3 مليون ده إنت هتكون بتلتزم بـ29,400 جنيه سنوياً مدى الحياة، وده رقم هيزيد مع الوقت كمان عشان عوامل كتير.
إيجابيات الكلوب هاوس في قرار الشراء
قبل ما تبص على التكلفة لازم تعرف إن الكلوب هاوس مش مجرد إضافة ترفيهية، لكنه عنصر ممكن يضيف قيمة حقيقية لتجربة السكن، ودي أهم إيجابياته اللي ضروري تعرفها قبل قرار الشراء:
- رفاهية حقيقية على باب البيت: لأنك مش هتحتاج تطلع من الكمبوند عشان تروح الجيم أو المسبح، كل حاجة هتكون موجودة جنبك.
- بيزود القيمة الاستثمارية: فالوحدات اللي فيها كلوب هاوس مميز في الكمبوندات بتكون أسهل في البيع أو التأجير.
- بيئة اجتماعية وأمان: لأن الكلوب بيخلق مجتمع بين السكان وبيكون مكان آمن للأطفال الصغار كمان.
- بديل اقتصادي: فلو حسبت تكلفة اشتراك جيم خاص بتوصل ل1200 كل شهر+ نادي رياضي، هتلاقي إن الكلوب هاوس سعره منطقي.
سلبيات الكلوب هاوس في قرار الشراء
بالرغم من المميزات الفريدة للكلوب هاوس، إلا إنه ليه بعض العيوب بردو، ودي أهمها:
- تكلفة عالية ومستمرة: مش كل الناس محتاجة أو قادرة تدفع 15 أو 30 ألف جنيه إضافية كل سنة.
- مش كل الناس بتستخدمه: كتير بيدفعوا وميستخدموش الخدمات دي خصوصاً لو شغلهم بعيد أو عندهم التزامات تانية.
- الزحمة في المواسم: هتلاقي إن في أوقات الذروة زي الإجازات والويك إند الكلوب ده بيكون مزدحم وصعب تلاقي مكان فيه.
- صعوبة الإلغاء: انت لو قررت بعد فترة إنك مش عايز تكمل هتلاقي إن مش كل الكمبوندات بتسمحلك بالإلغاء أو انك تاخد فلوسك.
هل الـClubhouse بيزود قيمة الاستثمار في الشقة؟
أيوة بس مش في كل الحالات، فالكلوب هاوس بيزود قيمة الاستثمار لو مجهز فعلاً ومش مجرد ديكور، أو لو في إدارة محترفة وصيانة دورية، أو إن المنطقة فيها طلب عالي على الإيجار من أسر بميزانية فوق المتوسط.
لكن الكلوب هاوس مش هيفرق لو مهمل أو مش مستخدم، أو إن المنطقة أصلاً فيها عرض أكبر من الطلب، أو المستأجرين أو المشترين المستهدفين مش من الفئة اللي بتهتم بالرفاهيات دي.
إزاي تتأكد من شفافية حسابات الـMaintenance؟
من أكبر المشاكل اللي بيشتكي منها العملاء دايما هي إنه بيدفع صيانة بس مش بيشوف مقابل، عشان كده لازم تتبع شويه خطوات عملية عشان تتأكد من شفافية حسابات الـMaintenance:
- اطلب كشف حساب تفصيلي: واسأل الشركة المطورة أو إدارة الكمبوند عن تفاصيل بنود الصيانة، لأن أي شركة محترمة المفروض يكون عندها شفافية.
- اتكلم مع سكان حاليين: قبل ما تشتري، حاول تتواصل مع ناس ساكنة فعلاً في الكمبوند واسألهم عن تجربتهم.
- اقرا العقد كويس: لأن فيه بند في العقد بيوضح كل حاجة خاصة بالصيانة والكلوب، فلو لقيته غامض اطلب توضيح قبل ما توقع.
- تابع مع جمعية السكان: فيه كمبوندات كتير بيكون فيها جمعية سكان بتراقب المصاريف وتطالب بالشفافية، فحاول تنضم ليها.
مين اللي يناسبه يدفع في الكلوب هاوس ومين لا؟
الكلوب هاوس هيكون مناسب ليك لو:
- عيلتك كبيرة ومحتاج مساحات ترفيهية آمنة للأطفال.
- إنت شخص رياضي وبتستخدم الجيم والمسبح بشكل منتظم.
- عندك دخلك مستقر ومش هيفرق معاك تدفع 15-30 ألف سنوياً.
- بتشتري للسكن الشخصي وعايز lifestyle معين.
- الكمبوند قريب من شغلك وهتقدر تستفيد من الخدمات دي كلها فعلاً.
والكلوب هاوس مش هيكون مناسب ليك لو:
- هدفك استثماري بحت وعايز تأجر أو تبيع بسرعة.
- ميزانيتك محدودة ومش قادر تتحمل التزامات شهرية إضافية.
- مش شخص رياضي ومش هتستخدم الخدمات دي.
- بتشتري وحدة صيفية أو مش هتسكن فيها طول السنة.
- مكان شغلك بعيد ومش هتلحق تستفيد من الكلوب.
هل ممكن أدفع Maintenance لوحدة مغلقة مش مستخدمة؟
أيوة للأسف، لأن رسوم الصيانة بتكون إجبارية سواء إنت ساكن في الوحدة أو لا، لأنها بتغطي الخدمات المشتركة في الكمبوند كله من أمن ونضافة وإنارة.
نصايح للتفاوض على رسوم الكلوب قبل الشراء
حاول تسأل الأول لو فيه عروض، لأن بعض المطورين بيعملوا إعفاء من رسوم العضوية للمشترين الأوائل، كمان تفاوض معاهم إنك تأجل الدفع، فبدل ما تدفع العضوية مع الاستلام، ممكن تأجلها لمدة سنة أو سنتين، كمان اطلب باقات عائلية لو عندك أكتر من وحدة أو أكتر من فرد عشان هيتعملك خصم كويس.
في النهاية، Maintenance و Clubhouse مش حاجة وحشة أو نصب، لأن دي خدمات حقيقية بتدفع فيها مقابل حقيقي، بس المشكلة لما حد يشتري من غير ما يحسبها صح، ويتفاجئ بعدين إن الالتزامات الشهرية أكبر مما كان متوقع.
عشان كده قبل ما تشتري أي وحدة، لازم تجمع التكلفة الحقيقية الشاملة لسعر الشقة والصيانة الشهرية وعضوية واشتراك الكلوب (لو موجود) وتكاليف الكهرباء والمياه وأي رسوم إدارية تانية، واسأل نفسك بصراحة لو هتقدر تدفع ده بشكل مستمر ولا لا.
ولو محتاج تعرف أكتر عن مشاريع معينة وتكاليفها الحقيقية أو أي معلومة بخصوص رسوم الصيانة ، تواصل معانا في SIVA Properties، وهنساعدك تختار المشروع اللي يناسب ميزانيتك و lifestyle بتاعك.
