حابب تنتقل لسكن جديد؟
أو بتفكر في مكان يكون سكنك انت وأسرتك في المستقبل القريب؟
الإنتقال وقرار اختيار مكان جديد كليًا للسكن قرار مش سهل على الإطلاق، وبيحتاج تفكير وتأني واختيار على أسس سليمة وواضحة. وعشان تكون معايير اختيار السكن المناسب ليك معايير مظبوطة لازم تكون عارف من البداية إيه هي أولوياتك والمواصفات المتوفرة في السوق حواليك.
في المقال ده هنساعدك تعرف أهم 9 معايير لاختيار السكن المناسب، عشان تقدر بسهولة تحدد العوامل اللي هتكون فعالة في اختيارك لبيتك الحالي أو المستقبلي. العوامل اللي بنختار على أساسها المكان اللي هنسكن فيه عوامل منها الأساسي ومنها الترفيهي ولكن كلها على نفس القدر من الأهمية، وتحري توافر العوامل دي هيخلي مكان سكنك مكان متكامل ومريح بالنسبالك على المدى الطويل، والعوامل دي ممكن تكون عوامل مادية، أو ليها علاقة بالمنطقة اللي هتسكن فيها، او بالمناطق المحيطة بيها، او باختلاف شخصيتك وأولوياتك اليومية.
هنتكلم عن العوامل دي وهنحددها في 9 نقط واضحة تسهل عليك اختيارك وتوجهك ناحية أفضل مكان ممكن يكون سكن مميز ليك.
1. المستوى المعيشي:
أول حاجة بنفكر فيها في وقت الانتقال أو في مرحلة البحث عن مكان نسكن فيه بتكون ” طبيعة المستوى المعيشي” هل انت بتدور على مستوى معيشي أعلى من مستواك الحالي؟ أو بتدور على مكان مماثل لمكان سكنك حاليًا؟
سؤال مهم وإجابته بتحدد قائمة اختياراتك بشكل كبير وبتخليها أسهل لأنك بتستبعد الاختيارات اللي هتكون مش مناسبة لاحتياجك أو لرغبتك بالنسبة للمستوى المعيشي اللي حابب تسكن فيه.
تحديد المستوى المعيشي اللي حابب تسكن فيه هيساعدك كمان في اختيار سكن مناسب متحسش فيه بضغوط مادية في المجتمع المحيط بيك بما لا يتناسب مع دخلك، أو تحس فيه بنقص في احتياجاتك الأساسية أو الترفيهية.
2. مين هيكونوا جيرانك!
دايمًا بنسمع حكمة شهيرة بتقول ” اختار الجار قبل الدار” وفي الواقع انها حكمة مفيدة جدًا والعمل بيها بيكون أساسي عشان تحقق الراحة والإطمئنان في السكن خوف من مشاكل يومية بتحصل بسبب الجيران واختلافاتهم.
اختيار المجتمع اللي هتسكن حواليه وهيكونوا جيرانك ممكن يتم عن طريق البحث الكويس عن المجتمعات اللي بتكون انتقائية في عملاءها وبالطريقة دي هتلاقي مميزات كتير زي:
- الخصوصية.
- الهدوء.
- وفرصة لكسب أصدقاء جدد يكونوا أشخاص ليهم مبادئ وعلى خلق.
الجيران المميزين كمان هيكونوا أول عون ليك في أي مشكلة طارئة تحصل لك او لأسرتك، وتحري الدقة في اختيارهم هيسهل عليك أوقاتك الصعبة وهتلاقي منهم المشاركة بشكل لطيف ومريح.
3. الأمان:
قبل الانتقال لأي مكان جديد مهم جدًا نتحرى عن المستوى الأمني في المنطقة، ومعدل الجرائم أو الحوادث اللي لازم يكون شبه معدوم. والاهتمام بالأنظمة الأمنية في المشروعات العمرانية حاليًا يعتبر من أولى الأساسيات اللي بيدور عليها العميل في مواصفات المشروع.
اختيار منطقة سكنية ذات نظام أمني عالي ومحكم بيخليك مطمئن على بيتك أو على أسرتك في غيابك أو حتى في الأوقات العادية. ومن خلال الأمان في المنطقة السكنية هتقدر تستمتع بكل الخدمات والمميزات في أي وقت بدون قلق أو خوف من السرقات أو التعديات اللي بنسمع عنها في مناطق كتير.
4. الخدمات الصحية والتعليمية:
أهم خدمات بنسأل على توافرهم وجودتهم في المكان اللي هنسكن فيه هي الخدمات التعليمية سواء حضانات أو مدارس أو جامعات، والخدمات الصحية زي المستشفيات والعيادات ومراكز الصحة.
مهم جدًا في مكان السكن تلاقي حواليك منشئات تعليمية كويسة وعلى قدر عالي من الاهتمام وكمان تكون قريبة عشان تكون مطمئن على أولادك فيها، ومهم كمان قربك من الخدمات الصحية وتكون كمان على مستوى عالي من الجودة والجهازية لأي حالات طارئة عشان تقدر تلجألها في الطوارئ وانت واثق من مستوى المعدات والطواقم الطبية.
5. الموقع وسهولة الوصول ليه:
بعد الانتقال لمكان سكني جديد وخصوصًا في الفترات الأولى بيكون أكبر عائق هو الانتقالات والطرق. ومن أهم العوامل اللي لازم ناخدها بعين الاعتبار أثناء اختيارالمكان اللي هنسكن فيه هو استراتيجية الموقع وسهولة الوصول ليه والتنقل منه للأماكن اللي هنتردد عليها بشكل مستمر.
على سبيل المثال بتكون الأفضلية في بعض الأحيان للأماكن اللي تقدر بسهولة توصل منها للطريق الدائري أو للمحاول الرئيسية لأنها بتوفر عليك وقت كبير جدًا وبتسهل عليك انك تروح أي مكان. تقدر تختار مكان سكني يكون موقعه قريب من أهم الطرق اللي هتحتاجها عشان توفر وقتك ومجهودك ومتشيلش هم الانتقالات اليويمة.
6. توافر الخدمات:
من أهم معايير اختيار سكن مناسب هو توافر الخدمات المختلفة بالقرب منه. فلو افترضنا المقارنة بين مكانين؛ الأول مكان هادي وراقي ولكن بيبعد عن الخدمات مسافة طويلة وصعب توصل فيه للخدمات بسهولة، والثاني مكان امكانياته أقل ولكن خدماته متوفرة وقريبة جدًا ف الاختيار على الأغلب هيروح للمكان الثاني.
احتياجاتنا اليومية مبتنتهيش وأحيانًا بنحتاج حجات كتير بشكل عاجل، في وجود الخدمات القريبة هتقدر تلاقي مستلزماتك واحتياجاتك بسهولة سواء عن طريق انك تجيبها بنفسك أو عن طريق التوصيل واستخدام التطبيقات المختصة. ومن أهم الخدمات اللي لازم تكون موجودة بالقرب من مكان سكنك:
- مولات تجارية.
- صيدليات.
- سوبر ماركت.
- مراكز لصاينة السيارات.
وخدمات تانية كتير بتتحدد على حسب الأوليات لكل شخص وده اللي هنتكلم عنه في النقطة رقم 7 من معايير اختيار السكن المناسب.
7. أولوياتك تحدد المكان الأنسب لراحتك:
في النقطة دي من معايير اختيار السكن هنتكلم عن عامل متغير من شخص لشخص آخر، وهو أولويات السعادة عند كل شخص.
في بعص الأحيان بيكون ميول الأشخاص للسكن في مكان هادي بيحتوي على مساحات كبيرة من المناظر الطبيعية وحياة يغلب عليها طابع الاستجمام، وفي أحيان أخرى هنلاقي شخص بيختار حياة فيها أنشطة وفعاليات وبيغلب عليها حب الانطلاق والتغيير. في كل حالة من الحالات دي، وأيًا كانت طبيعتك بين المثال الأول أو الثاني، لازم يتحدد اختيارك حسب أولويتك وميولك، عشان تحس بالراحة والسعادة في مكان سكنك وتستمتع بحياتك بالشكل الأنسب لك.
8. صحة البيئة المحيطة بيك:
عمرك فكرت تستغنى عن استقرار صحتك في سبيل أي شيء مادي في الحياة؟
ودي النصيحة رقم 8 في معايير اختيار السكن الأنسب ليك، وهي انك تختار الأنسب لاستقرارك الصحي والنفسي على حساب أي عامل آخر.
وجودك في بيئة نظيفة وصحية ليه تأثير كبير جدًا على صحتك البدنية والنفسية واللي بالتأكيد هتخلي حياتك أحسن على المدى البعيد. ف من أهم عوامل اختيارك للمكان اللي هتعيش فيه انك تختار مكان أبعد ما يمكن عن كل أنواع التلوث، سواء في الهوا أو المياه أو حتى التلوث الضوضائي.
واختيارك لمكان سكني فيه مساحات خضرا كتير هيساعدك على تطبيق النصيحة دي لان المساحات الخضراء والأشجار بتساعد على تنقية الجو من العوادم والملوثات، صحتك وصحة أسرتك أهم من أي عوامل أخرى وتستحق تكون أولى الأسس اللي هتختار على أساسها.
التحقق من الأمور القانونية:
آخر نصيحة هنقدمها ليك من معايير اختيار السكن المناسب، واللي لا تقل أهمية عن أول نصيحة وعن ال 9 عوامل بالكامل، هي انك تتحرى كويس جدًا وتتحقق بشكل دقيق عن الأمور القانونية الخاصة بالوحدة السكنية اللي هتختارها، وتتأكد من صحة كل ما يخص أوراقها والجهات التابعة ليها.
ده هيحفظلك حقوقك المادية والقانونية وهيخليك مطمئن دائمًا، وتقدر تطالب بحقوقك في أي وقت.
والاستعانة بجهات موثوقة تساعدك وتزيد الثقة في امتلاك وحدتك السكنية وتساعدك تلاقي المكان السكني اللي بتحلم بيه بكل المواصفات اللي محتاجها وكمان يضمن صحة ودقة العقود والأوراق القانونية هيسهل عليك وهيخليك مرتاح أكتر في اختيار مكان سكنك الحالي او للمستقبل.
وتقدر تستعين بفريق سيفا بروبرتيز عشان يساعدك توصل لاختيار مقنع 100% لوحدتك السكنية أو أي مساعدة أخرى في مجال العقارات.
اختيارك لمكان تسكن فيه تعدى مجرد كونه حيطان أو تشطيب أو عفش، قرار اختيارك لمكان تعيش فيه حياة قرار بيعتمد على عوامل كتير جدًا، وتطبيقك للعوامل ال 9 اللي اتكلمنا عنها من معايير اختيار السكن المناسب هيساعدك ويسهل عليك تحقق اختيار موفق بشكل أسهل.
ولكن في النهاية مش هتلاقي قاعدة ثابتة وواضحة بيمشي عليها كل البشر، القرار الصحيح هو القرار اللي هيكون مناسب لأولوياتك، ورغباتك، وأسلوب حياتك.
