لو انت من متابعين السوشيال ميديا أو المواقع الإخبارية أو التلفيزيون أو حتى الجرائد، فبالتأكيد خلال اليومين اللي فاتوا سمعت عن مشروع رأس الحكمة. وعشان نوضح لك ايه الموضوع جمعنا لك تصريحات المسؤولين وكل تفاصيل مشروع رأس الحكمة في الخبر ده.
خلينا في البداية نوضح لك ايه هي مدينة رأس الحكمة، موقعها، ومميزاتها، وكل المقومات اللي تؤهلها تكون مشروع ناجح واستثمار مميز.
مدينة رأس الحكمة هي مدينة من مدن الساحل الشمالي الغربي واللي بتقع بالتحديد بين الكيلو 170 والكيلو 220. وتعتبر رأس الحكمة تابعة لمحافظة مرسى مطروح واللي بتبعد عنها حوالي 85 كيلو. مدينة رأس الحكمة مساحتها تقدر بحوالي 55 الف فدان. وفيها من المميزات الطبيعية والمقومات السياحية حجات مميزة جدًا زي الشاطئ الرملي الناعم والمياه الفيروزية المميزة.
ومن أهم مميزات مدينة رأس الحكمة حاليًا هو انها قريبة من مدينة العلمين واللي هتزيد من فرص الاقبال عليها، وكمان طريق الفوكا الجديد واللي هيسهل الوصول بين القاهرة والساحل الشمالي وهيختصر مساحة كبيرة جدًا من طريق السفر.
تفاصيل مشروع رأس الحكمة:
بعد ما عرفنا بعض مميزات مدينة رأس الحكمة ومواصفاتها هنبدأ نتكلم عن تفاصيل المشروع الاستثماري اللي يعتبر حديث الدولة من وقت الإعلان عنه.
مشروع رأس الحكمة هو مشروع استثماري أجنبي مباشر بين مصر والإمارات، واللي أعلن عنه رئيس الوزراء المصري مصطفى مدبولي ووضح تفاصيل الاتفاقيات والجانب المادي ومدى استفادة الدولة منه في مؤتمر الإعلان عن المشروع. المشروع قائم بتعاون بين مصر والمستثمر الأجنبي المتمثل في شركة أبوظبي القابضة للتنمية واللي هتكون مسئولة عن مشروع تطوير رأس الحكمة. وطبيعة التطوير هتكون عبارة عن تأهيل المدينة لإنها تكون وجهة سياحية تجذب السياح لمصر وده بيضمن ليها عائد مستمر من الاستثمار أجنبي.
وعلى لسان رئيس الوزراء المصري، وضح لنا أهمية المشروع الإقتصادية بالنسبة لمصر، ووضح كمان تفاصيل الشراكة وهي كالتالي:
طبيعة الشراكة وحصة الدولة المصرية في مشروع تطوير رأس الحكمة هتكون مقسمة لشقين:
- الشق الأول هو المقدم المدفوع من المستثمر الأجنبي واللي هيكون عبارة عن 35 مليار دولار أمريكي.
- والشق الثاني هو عبارة عن نسبة 35% من أرباح المشروع مدى الحياة.
والجزء ده من تفاصيل مشروع رأس الحكمة هنتكلم فيه باستفاضة أكتر بعد ما نتكلم عن تصريحات رئيس الوزراء اللي وضح فيها أهمية المشروع والفائدة اللي هتعود على الدولة المصرية من تطوير مشروع رأس الحكمة.
أهمية مشروع تطوير رأس الحكمة للدولة المصرية:
من أهم التصريحات اللي وردت على لسان رئيس الوزراء المصري هو أهمية مشروع رأس الحكمة الاقتصادية للدولة المصرية واللي ليها جوانب متعددة وهيكون ليها دور قوي في حل أزمة السيولة النقدية. ومن عوامل أهمية مشروع تطوير رأس الحكمة انه هيساعد في:
توفير سيولة دولارية
وده لأن الاتفاقية بتنص على دخول مبلغ مقدم بقيمة 35 مليار دولار أمريكي لمصر خلال شهرين. المبلغ هيكون مقسم على دفعتين، الدفعة الأولى خلال أسبوع من إتمام الشراكة، بحيث تستقبل مصر مبلغ 15 مليار دولار ( 10 مليار سيولة دولارية نقدية، و5 مليار تنازل من دولة الإمارات عن الودائع الخاصة بيها في مصر)، وبعد شهرين من الدفعة الأولى هيكون ميعاد الدفعة التانية، واللي هتكون عبارة عن 20 مليار دولار( 14 مليار سيولة نقدية، و6 مليار تنازل عن باقي قيمة الودائع الإماراتية في مصر).
استقرار سوق النقد الأجنبي
صرح رئيس الوزراء المصري ان الشراكة في مشروع تطوير رأس الحكمة هيساعد في استقرار سوق النقد الأجنبي وهيحد من وجود سعرين للعملة الأجنبية في مصر وده هيساعد في مواجهة التضخم ويضفي بعض من التستقرار للجنية المصري.
مصدر مستدام للعملة الأجنبية
باستقبال مصر لنسبة 35% من أرباح مشروع تطوير رأس الحكمة بيضمن دخول دائم للعملة الأجنبية بعد تشغيل المشروع واللي هتساعد دايمًا في نهضة الاستثمار والاستفادة المربحة من أصول الدولة المصرية.
مصدر جذب للسياحة
تطوير مدينة رأس الحكمة هيكون سبب لجذب عدد يقدر بحوالي 8 مليون سائح سنويًا بحسب تصريحات رئيس الوزراء المصري، وده هيعود بالنفع على حركة الاقتصاد المصري في جوانب كتير جدًا. وعوامل الجذب السياحية في رأس الحكمة هتكون في الأنشطة الساحلية والمارينا والمستوى العالمي للتطوير. بالاضافة للوجهات الأثرية الموجودة في منطقة رأس الحكمة.
توفير فرص عمل
بطبيعة المشروعات الناشئة والمدن الجديدة، تطوير رأس الحكمة هيساهم في توفير فرص كتير جدًا للأيدي العاملة في مصر وهيساعد في تقليل نسبة البطالة.
تقليل الدين الخارجي لمصر
تنازل دولة الإمارات عن ودائع بقيمة 11 مليار دولار من الودائع الخاصة بيها في مصر، تحت بند المبلغ المقدم المدفوع في الشراكة في مشروع تطوير رأس الحكمة يعتبر بمثابة سداد 11 مليار دولار من الدين الخارجي المصري لدولة الإمارات. والي هيتم تحويلهم بالجنيه المصري وضخهم في المشروع.
فرصة لجذب استثمارات أكبر
بيتوقع رئيس الوزراء المصري ان مشروع تطوير رأس الحكمة هيكون فرصة لجذب استثمارات أكتر لمصر، وده لأن نجاح المشروع هيفتح آفاق أكثر للتطوير وهيجذب المستثمرين عشان يستفيدوا من الموارد والإمكانيات المتوفرة واللي هتساعدهم في بناء استثمارات ناجحة.
بكدا نكون شرحنا أهم تفاصيل مشروع رأس الحكمة اللي بيتم بشراكة بين الدولة المصرية ودولة الإمارات من خلال الاستفادة من أصول الدولة، بحيث تكون أرض لمشروعات عمرانية سياحية تساعد على حل الأزمات الاقتصادية وتساعد مصر على تخطى ضغوط التضخم وسداد جزء من الديون الخارجية.