حابب تستثمر في العقارات داخل مصر ومش عارف تبدأ منين؟
أو عندك فرصة للاستثمار عمومًا ومش عارف إيه الاتجاه الأنسب حاليًا؟
في المقال ده هنقول لك بالتفصيل إزاي تبدأ الاستثمار العقاري الناجح في مصر ونوجهك لأول الطريق اللي تقدر منه تلاقي الفرصة الأنسب ليك واللي تضمن لك تلاقي وحدة تناسبك، وتقدر من خلاله تتوقع وتتابع نمو استثمارك والعائد منه. ومن أهم النقاط اللي هنتكلم عنها :
- أهم الخطوات لاستثمار عقاري ناجح.
- أنواع العقارات المتاحة في مصر.
- ازاي تختار العقار الأنسب ليك!
- عامل الوقت واهميته في نجاح استثمارك العقاري في مصر.
لو مهتم تعرف ازاي تبدأ الاستثمار في العقارات داخل مصر تابع قراءة باقي المقال.
أهم الخطوات لاستثمار عقاري ناجح:
عشان تقدر تحقق نتيجة مبهرة من أي خطوة انت مقبل عليها في الحياة لازم يكون عندك قدر كافي من المعرفة؛ معرفتك بقدراتك ومعرفتك بالبيئة المحيطة اللي هتؤثر على الخطوة دي. وبالمثل في الاستثمار العقاري الناجح في مصر، لازم يكون عندك قدر كافي من المعرفة بعدة نقط هي:
· وضع السوق الحالي:
بدراستك لوضع السوق العقاري هتكون قادر تعرف أكتر إيه أنسب اختيارات متاحة، وتقدر تعرف معلومات كتير توجهك أكتر ناحية أفضل خيارات الاستثمار العقاري في مصر ودراسة السوق بتكون عن طريق الاهتمام بمعرفة بعض النقاط والبحث فيها زي:
- مستويات العرض والطلب: واللي من خلال بحثك فيها تقدر تقرر إيه المناطق أو المشروعات اللي بترتفع فيها مستويات العرض والطلب واللي بيكون عليها إقبال من العملاء ومن هنا تقدر تحدد مستوى المنافسة في السوق وبالتالي تحدد اتجاهك في الاستثمار.
- اتجاهات الأسعار: معرفتك الجيدة باتجاهات الأسعار في السوق العقاري بتساعدك تحدد أنسب نوع في الاستثمار العقاري من حيث سعره وبيساعدك أكتر تقرر أنسب وقت تستثمر فيه وتكون ملم بمدى التغير اللي بيحصل في وقت معين سواء لتحديد الفترة اللي هتستثمر فيها أو العائد اللي ممكن تحصل عليه.
بالإضافة للمقارنة بين المناطق المختلفة في الأسعار المعروضة واللي بيوضحلك مستقبل كل منطقة وتطور العقارات فيها. - البنية التحتية: تعتبر من أهم نقاط دراسة السوق لأنها بتضمنلك معرفة مستقبل المشروعات اللي ممكن تمتلك فيها وحدتك العقارية بهدف الاستثمار وده لأن كلما زادت جودة البنية التحتية كلما ضمنت الإقبال على المشروع وبالتالي تضمن دايمًا العائد المجزي من الإيجار أو إعادة البيع، وتتجنب التكاليف الزيادة في الصيانة بشكل دوري.
- القوانين: متابعتك لتطور القوانين واللوائح العقارية الخاصة بالنوع اللي بتستهدفه أو المنطقة بيخليك واعي دايمًا للمخاطر أو المشكلات اللي ممكن تواجهك أثناء استثمارك في العقار، وبتخليك كمان على دراية بأهم النقاط اللي تاخد بالك منها أثناء بحثك عن عقار معين من حيث ملائمته والتزامه بالمعايير القانونية اللي بتضمن لك حقك طول الوقت.
- خصائص المنطقة المستهدفة: لو قررت تستثمر في منطقة معينة لازم تعرف أهم الخصائص اللي هتنجح استثمارك العقاري فيها، زي الخدمات المتوفرة فيها وطبيعتها الجغرافية ومستوى الأمان فيها، والعوامل دي هتكون سبب إما في زيادة الإقبال عليها أو الابتعاد عنها.
بالإضافة لنوعية السكان الموجودين في المنطقة دي واللي هيساعدك تقرر نوع العقار اللي هيكون عليه إقبال شديد والفئة السعرية اللي هتكون دارجة بينهم. - الأمثلة المشابهة لاختيارك: من ضمن أهم التحريات اللي لازم تعملها في دراستك للسوق هي بحثك عن أمثلة مشابهة فعلية لنوع الاستثمار اللي حابب تختاره، وحبذا لو قدرت تتحاور مع نماذج فعلية خاضوا نفس التجربة لأنه هيساعدك تكون صورة واقعية عن كل مميزات وعيوب التجربة والتوقعات المحتملة اللي ممكن تقابلك.
· هدفك إيه من الاستثمار العقاري!
في الجزء ده بنوجه كل تفكيرنا لمعرفة هدفك الشخصي من الاستثمار بعد تكوين صورة شاملة عن وضع السوق. واللي منها هتقدر تكمل خطواتك بثبات أكتر وبدون تردد. والهدف من الاستثمار بيكون منقسم لأكتر من جزء؛ زي نوع العقار اللي حابب تستثمر فيه، أو شكل الاستثمار نفسه سواء إيجار أو إعادة بيع وشراء وهكذا.
وهنا لازم تسأل نفسك بالتفصيل عن هدفك وتعرفه بشكل مفصل لأن ده هيساعدك بشكل كبير تكون محدد وتوفر وقت وتحد من الشتات في المرحلة دي.
· تحديد الميزانية المتاحة لاستثمارك العقاري:
بعد دراسة السوق وتحديد نوع العقار وشكل الاسثمار اللي حابب تقوم بيه، بيجي دور تحديد الميزانية الخاصة بالاستثمار ده. وهنا لازم تكون صريح وواقعي مع نفسك وتدرس كويس القيمة المادية اللي حابب تبدأ بيها استثمار عقاري داخل مصر، وهل هي مناسبة لدراستك للسوق واختيارك أو لا، في حالة انها مناسبة بتبدأ تتأكد أكتر من كل التفاصيل اللي هتكون محتاجة منك بذل مالي زي التراخيص والأوراق وكل البنود مهما كانت بسيطة، لأنها في الاخر بتكون زيادة على الإجمالي وبتفاجئك برقم أكبر من المتوقع.
تحديدك للبند ده بتفصيل وواقعية هيساعدك في اختيارك للأنسب واللي تضمن من خلاله نجاح معادلتك في استقبال عائد يغطي تكاليفك بل ويوفر لك منها ربح كمان.
· الاستعانة بأهل الخبرة:
نتيجة البحث المتقن والمعرفة الجيدة بمتطلباتك وقدراتك والمواصفات اللي محتاجها لازم يتبعه استعانة بحد له خبرة عشان يساعدك في إتمام قرارك وخطوتك تجاه الاستثمار العقاري داخل مصر. وهنا بيجي دور البحث الجيد عن أشخاص موثوقين تقدر تطلعهم على تفاصيل خاصة زي ميزانيتك وهدفك من الاستثمار وتتناقش معاهم بكل أريحية عشان يدلوك على أنسب طريق تحقق منه غايتك.
وهما بدورهم لازم يتحلوا بأعلى درجات الشفافية ويوجهوك دايمًا نحو الأنسب ليك واللي هيعود عليك بالنفع وتحس من ناحيتهم بالثقة والإطمئنان وانهم بيسعوا لمصلحتك بنفس قدرك وبزيادة عليه خبرتهم في المجال.
كل الصفات دي تقدر تلاقيها في فريق سيفا بروبرتيز واللي هيساعدك تلاقي أنسب وحدة لاستثمارك العقاري في أنسب مشروع بالمواصفات اللي تحبها ويوجهوك ويدولك نصائح عشان استثمارك يكون أنجح، وتقدر تشوف آراء عملاء تانيين في التعامل مع فريق سيفا بروبرتيز ومدى رضاهم عن النتائج من هنا.
· الإدارة الجيدة للعقار بعد الشراء:
نجاح استثمارك العقاري مش بينتهي بمجرد انك تشتري العقار المناسب؛ ولكن أهم خطوة بتكون آخر خطوة وهي ازاي هتدير العقار ده وازاي هتحقق استثمارك من خلاله. إدارتك للعقار اللي بتمتلكه بتتمثل في إنك تحقق هدفك من شراءه بالطريقة الأمثل والأصح، يعني لو هدفك انك تأجره فيكون الإيجار بأفضل عائد بما يتماشى مع السوق، وبأنسب طريقة تحفظ لك حقوقك في استرداده زي م بدأت تأجره بالظبط بدون تلفيات أو خساره.
أما لو كان الهدف إعادة البيع فمن حسن إدارتك للعقار هو معرفة أنسب وقت لإعادة البيع بالنسبة للمشروع والمنطقة واللي تقدر منه تحقق ربح مميز يسمحلك تستمر في استثمارك بنفس الشكل أو بأشكال تانية. وتقدر تقرأ مقالنا عن الخطوات اللي تساعدك في تحقيق معادلة الاستثمار العقاري الناجحة من هنا.
أنواع العقارات المتاحة في مصر:
عشان نساعدك في تحديد نوع العقار الأنسب ليك في الاستثمار العقاري داخل مصر، هنوضلح لك هنا أنواع العقارات الموجودة داخل مصر عشان نسهل عليك عملية المفاضلة بينهم واختيار الأنسب ليك:
· عقار سكني:
وده من الأنواع المتاحة بكثرة في سوق العقارات في مصر، وبيتمثل في أنواع زي الاستوديوهات والشقق السكنية بمساحات مختلفة والدوبليكس أو البنتهاوس، والفيلات اللي منها توين أو تاون هاوس أو فيلات مستقلة. كل شركة تطوير عقاري بتتميز في مشروعاتها وبتقدم اختيارات منوعة من الوحدات السكنية وتقدر تقرر منها حسب ميزانيتك والمواصفات اللي محتاجها.
· وحدات تجارية:
ودي هتلاقيها بكثرة في المولات وبتكون على هيئة محلات بمساحات مختلفة وبمواصفات متنوعة تقدر تختار منها النوع المناسب للاسثمار اللي حابب تبدأ فيه وتفاضل بين المناطق والفئة المستهدفة.
· وحدات إدارية:
الوحدات الإدارية بتكون عبارة عن مكاتب في مباني مختلطة أو مباني مختصة للمكاتب الإدارية فقط وتقدر تختار منها بناء على المواصفات اللي تناسبك أو الميزانية اللي هتحددها للنوع ده من الاستثمار.
· وحدات سياحية:
والنوع ده من الوحدات بينتشر ويزدهر في مواسم معينة من السنة وبتلاقيه في مشروعات قرى أو منتجعات في مناطق ساحلية، وممكن تلاقي منه شاليهات أو فيلات حسب المواصفات المناسبة ليك، والاختيارات فيه متعددة وبيلجأ ليها عملاء كتير.
إزاي اختار العقار الأنسب ليا!
بين كل الأنواع المتاحة في العقارات في مصر بتحس انه تحديد النوع الأنسب ليك بيكون صعب نظرًا لكثرة الأنواع والمشاريع والآراء، وهنا قررنا نقول لك بعض النقاط اللي ممكن تساعدك تختار الأنسب ليك على أساسها زي:
- هدفك من الاستثمار: لو قدرت تحدد هدفك من الاستثمار العقاري هتقدر تقلل دايرة اختياراتك من الأنواع والمشروعات الكتير المطروحة حاليًا، والهدف ده هيساعدك تكون محدد أكتر في باقي خطواتك فلابد يكون أول حاجة تستقر عليها وتكون متأكد منها.
- تقييم وضعك المالي: وهنا بتكون أكتر صراحة مع نفسك وبتحصر دايرة اختياراتك أكتر في المناسب ليك ولميزانيتك النحددة للاستثمار ده. وهتساعد كمان جدًا في تسهيل الخطوة الجاية.
- إسأل أصحاب الخبرة: بناءً على تحديد أولوياتك وإمكانيتك هيكون من أهم الخطوات في تحديد نوع العقار الأنسب ليك إنك تسأل أصحاب الخبرة لإنهم بيكون عندهم دراية وإلمام بالمتوفر في السوق، وبمجرد إخبارهم بإمكانياتك ومواصفاتك اللي محتاجها تتوفر في العقار بيعرضوا عليك قائمة بالاختيارات اللي تناسبك ويوفروا عليك وقت وجهد ويضمنوا لك الجودة والصحة القانونية.
الوقت من أهم العوامل في نجاح استثمارك العقاري داخل مصر:
من أهم النصايح اللي بنقدمهالك قبل ما تبدأ استثمار عقاري داخل مصر في 2024، وبالنظر للأحداث العالمية اقتصاديًا وعلى أصعدة أخرى، هو انك تنتبه جدًأ للوقت قبل وأثناء وبعد شراء وحدتك العقارية. والانتباه للوقت هيكون مفيد لو ركزت في اتجاهات معينة منها:
- توقيت البيع والشراء: من المعروف ان التوقيت بيفرق جدًا في حركة البيع والشراء في أي سوق في االعموم وفي سوق العقارات بالخصوص، وهنا من المهم تكون ملم بفترات الهبوط أو العروض واللي تقدر تشتري فيها بأفضل أسعار ومميزات، وبالمثل أوقات الإقبال واللي بتتزايد فيها أسعار الوحدات وتقدر تبيع فيها بأعلى عائد.
- توقيت الإيجار: لو هدفك من الاستثمار العقاري هو الإيجار فهيكون مهم تكون على دراية بأفضل الأوقات اللي تأجر فيها وحدتك العقارية، واللي بتختلف من نوع لنوع ومن مشروع لآخر حسب أسباب الطلب على المكان اللي بتتواجد فيه الوحدة. زي الأماكن الساحلية والمعروف أوقات الإقبال على الإيجار فيها بتكون في مواسم الصيف، أو الوحدات القريبة من منشآت تعليمية واللي بيزيد الطلب عليها في أوقات الدراسة.
- خطتك الزمنية الشخصية: إلمامك بخطتك الزمنية الشخصية هيساعدك تحدد أهدافك من الاستثمار العقاري وتسعى لتحقيقها ومتتكاسلش في متابعة التطورات أو اتخاذ قرارات معينة وخطوات ثابتة عشان توصل لهدفك في الوقت اللي انت محدده.
- التطوارت القانونية بمرور الوقت: متابعتك لتطورات القوانين الخاصة بالاستثمار العقاري من وقت للتاني بيساعدك جدًا تحافظ على حقوقك وعلى استثمارك من الخسارة أو انه يفقد قيمته. وده لأنك بتكون عارف المتطلبات والقوانين الخاصة بالبيع والشراء والإيجار ومتتعرضش للابتزاز أو التلاعب اللي ممكن يؤدي لخسارتك استثمارك بالكامل.
بعد ما اتكلمنا عن أهم النصائح اللي هتساعدك تبدأ استثمار عقاري داخل مصر في 2024، لازم تفكر بشكل واقعي وتكون خطتك مبنية على أسس وتجارب حقيقية وتحاول تبحث بأفضل طريقة وتكون قدر كافي من المعرفة لأنها بتحفظك من عمليات النصب وبالتالي بتحفظك من الخسارة. وبنفس القدر تعرف أهدافك وتحددها عشان تحفظ نفسك من الشتات وتنجح في تحقيق خطتك لاستثمار عقاري ناجح.