لو إنت قاعد دلوقتي بتفكر وبتقارن بين التجمع الخامس والشيخ زايد وحاسس إنك تايه، فصدقني إنت مش لوحدك، لأن السؤال ده بيحير آلاف العائلات والمستثمرين كل سنة، وللأسف معظم اللي هتلاقيه على النت إما كلام تسويقي مبالغ فيه أو آراء شخصية من ناس ساكنة في منطقة واحدة بس.
الحقيقة إن مفيش إجابة واحدة صح للجميع، لأن اللي يناسب عيلة عندها 3 أطفال ومحتاجة مدارس ونوادي، مش هو نفسه اللي يناسب مستثمر عايز عائد سريع، ومش هو نفسه اللي يناسب شاب بيشتغل في وسط البلد ومحتاج يوصل لشغله كل يوم، عشان كده في المقال ده هنساعدك تعرف إنت محتاج إيه بالظبط، وأي منطقة هتحققلك ده فعلاً.
نظرة شاملة عن التجمع الخامس
التجمع الخامس جزء من مدينة القاهرة الجديدة، ودي واحدة من أكبر وأنجح المدن الجديدة اللي اتبنت في مصر، والمشروع ده بدأ في منتصف التسعينات كامتداد عمراني لشرق القاهرة، وكان الهدف منه تخفيف الزحام عن القاهرة القديمة وتوفير سكن راقي للطبقة المتوسطة وفوق المتوسطة.
المنطقة بقيت واحدة من أكبر التجمعات السكنية في مصر، وفيه تقريباً مليون ونص شخص ساكن فيها، كمان مساحتها الإجمالية حوالي 70 كيلومتر مربع يعني تقريباً 16,800 فدان، وده بيخليها من أكبر التجمعات السكنية المخططة في مصر.
موقع التجمع الخامس
الموقع من أهم العوامل اللي بتحدد لو المنطقة دي ملائمة ليك ولا لا، وده موقع التجمع الخامس بالظبط:
- المنطقة بيحدها من الشمال الطريق الدائري الأوسطي، ومن الجنوب طريق السويس والعين السخنة، ومن الشرق العاصمة الإدارية الجديدة ومدينة المستقبل، ومن الغرب مدينة نصر ومصر الجديدة.
- عشان كده المنطقة موقعها استراتيجي بالنسبة لأي حد شغله أو نشاطه في شرق القاهرة، فلو إنت بتشتغل في مدينة نصر أو مصر الجديدة أو العبور أو مدينة الشروق أو العاصمة الإدارية، فالموقع ده هيوفر عليك ساعات يومياً في المواصلات.
- لكن لو شغلك في غرب القاهرة زي المهندسين أو الجيزة أو الدقي أو 6 أكتوبر، يبقى التجمع الخامس مش الخيار الأمثل ليك وهتعاني في المواصلات كل يوم.
أحياء التجمع الخامس
التجمع الخامس مش منطقة واحدة متجانسة لكنها مقسمة لأحياء كتير، وكل حي ليه طابع وأسعار مختلفة، ودي أشهر الأحياء:
- الحي الأول: وده من أقدم الأحياء في التجمع وقريب جداً من الطريق الدائري ومحور التسعين، كما فيه مزيج من العمارات القديمة والكمبوندات الحديثة.
- الحي الثاني: وهو منطقة سكنية هادية نسبياً وأقل كثافة من الحي الأول، كمان فيه كمبوندات محترمة وعمارات سكنية وقريب من نادي الشروق الرياضي.
- الحي الثالث: وده عبارة عن امتداد طبيعي للحي الأول والثاني، وفيه كمبوندات ومشاريع سكنية متنوعة.
- البنفسج أو الحي الرابع: وده من أرقى الأحياء في التجمع وموجود فيه فلل وقصور فخمة، كمان المنطقة دي هادية ومتخطط ليها بشكل جيد.
- اللوتس أو الحي الخامس: ودي منطقة سكنية فيها عمارات سكنية وبعض الكمبوندات.
- الحي السادس: والمنطقة دي حديثة وفيها فلل وتوين هاوس وشقق، كمان مميزة بإنها هادية.
- الحي السابع: وده من الأحياء الحديثة الموجود فيها مشاريع سكنية متنوعة، كمان لسه فيه توسعات تحت الإنشاء.
- المنطقة الجنوبية: ودي بتشمل الأحياء من 8 إلى 11، وموجود فيها مناطق حديثة وتحت التطوير وكمبوندات ضخمة زي ميفيدا وماونتن فيو وتاج سيتي.
الطرق الرئيسية في التجمع الخامس
التجمع مميز بشبكة طرق رئيسية قوية ومتخطط ليها بشكل منظم، وده سهل الحركة فيه وربطه بأماكن كتيرة في القاهرة ودي أهم الطرق بالمنطقة:
- محور التسعين الشمالي والجنوبي: وده الشريان الأساسي للتجمع الخامس، وبيربط المنطقة بالطريق الدائري من الشمال وبطريق السويس من الجنوب، والمحور ده مزدحم جداً في أوقات الذروة.
- الطريق الدائري الأوسطي: وده بيحد التجمع من الشمال، وبيوصلك بسهولة لمدينة نصر ومصر الجديدة، لكن برضو بيكون مزدحم في الصبح والمغرب.
- محور المشير طنطاوي: وده طريق جديد، وبيخفف الضغط عن محور التسعين وبيوصلك بالعاصمة الإدارية بسرعة.
- طريق السويس: وده بيربط التجمع بالقاهرة الجديدة الجنوبية وطريق العين السخنة.
أشهر الكمبوندات السكنية في التجمع الخامس
التجمع الخامس فيه مجموعة مميزة من الكمبوندات السكنية، ودي أشهرها:
1. كمبوند ميفيدا (Mivida)
الكمبوند ده موجود في الحي التاسع بالتجمع الخامس، على بعد دقائق من الجامعة الأمريكية، وإجمالي مساحته هي 890 فدان، وأنواع الوحدات الموجودة فيه هي:
- شقق مساحتها بتتراوح بين 100 متر لحد 300 متر.
- دوبلكس.
- توين هاوس.
- تاون هاوس.
- فلل مستقلة.
كمان مميز بأن فيه مساحات خضراء واسعة ونوادي رياضية ومدارس دولية
2. كمبوند ماونتن فيو (Mountain View)
الكمبوند ده المطور ليه بيكون شركة ماونتن فيو وموجود في شارع التسعين الجنوبي، وأنواع الوحدات المتوفرة هي شقق سكنية ودوبلكس وبنتهاوس وتوين هاوس وفلل لكن في بعض المشاريع.
3. كمبوند تاج سيتي (Taj City)
الكمبوند ده موجود في شارع التسعين الجنوبي وقريب من الطريق الدائري وبيمتد على مساحة 3.6 مليون متر مربع، وبالنسبة لأنواع الوحدات فيه فيتكون شقق سكنية ودوبلكس وتاون هاوس وتوين هاوس وفلل مستقلة.
والمشروع مميز بإنه ضخم ومتكامل وفيه نوادي ومرافق رياضية ومدارس دولية ومساحات خضراء
4. كمبوند الرحاب (El Rehab Compound)
المشروع بيقع في شمال شرق القاهرة الجديدة على بُعد حوالي 10 دقائق من مدينة نصر ومصر الجديدة، ومساحته أكثر من 10 مليون متر مربع، عشان كده هو من أكبر المجتمعات السكنية في المنطقة، وأنواع الوحدات الموجودة فيه هي شقق سكنية وفلل، وأسعاره بتختلف حسب المساحة والموقع داخل الكمبوند، فالشقق الكبيرة ممكن تبدأ من مستويات أعلى من 6,000,000 جنيه في بعض المناطق
المشروع بيقع في شمال شرق القاهرة الجديدة على بُعد حوالي 10 دقائق من مدينة نصر ومصر الجديدة، ومساحته أكثر من 10 مليون متر مربع، عشان كده هو من أكبر المجتمعات السكنية في المنطقة، وأنواع الوحدات الموجودة فيه هي شقق سكنية وفلل، وأسعاره بتختلف حسب المساحة والموقع داخل الكمبوند، فالشقق الكبيرة ممكن تبدأ من مستويات أعلى من 6,000,000 جنيه في بعض المناطق
المميز في المشروع إنه من أوائل المشاريع المتكاملة في القاهرة الجديدة بتخطيط حضري متوازن، كمان بيوفر خدمات متكاملة سواء تعليمية أو طبية أو تجارية، وموجود فيه مولات ومناطق تجارية وشبكة طرق داخلية واسعة ومساحات خضراء وبحيرات هادئة.
5. كمبوند ستون ريزيدنس (Stone Residence)
المشروع بيقع في شارع التسعين، وده خلاه مميز بمدخل استراتيجي قريب من الخدمات والمحاور الرئيسية، وبيمتد على مساحة حوالي 450 فدان، وأسعاره بتبدأ تقريبًا من 7,000,000 جنيه وأعلى حسب المساحة والموقع داخل الكمبوند.
الكمبوند مميز بموقعه الاستراتيجي جدًا وتصميمه الراقي واحتوائه على مساحات خضراء واسعة، كمان قريب من المدارس والمستشفيات والمحاور الرئيسية.
6. كمبوند ليك فيو ريزيدنس (Lake View Residence)
المشروع بيقع بالقرب من الجامعة الأمريكية ومطار القاهرة الدولي تقريبًا، ومساحته حوالي 300 فدان، وأنواع الوحدات السكنية فيه هي شقق سكنية مساحتها بتبدأ من 119 متر وفلل فاخرة مساحتها بتوصل لحوالي 650 متر وبنتهاوس ودوبلكس وتوين هاوس.
والأسعار في المشروع بتبدأ تقريبًا من 7,000,000 جنيه للوحدات السكنية حسب المساحة والموقع، والمشروع مميز بإنه مصمم بشكل حديث وعصري وفيه وحدات مطلة على المساحات الخضراء وفيه أماكن ترفيهية وحمامات سباحة ونوادي رياضية وأماكن مخصصة للعب الأطفال.
أسعار العقارات في التجمع الخامس 2026
أسعار المشاريع في التجمع الخامس بتختلف بشكل كبير حسب العوامل دي:
- الحي: فمثلًا حي البنفسج أغلى من اللوتس.
- نوع السكن: يعني لو كمبوند مغلق سعره هيبقى أغلى من عمارة عادية.
- القرب من الخدمات والطرق الرئيسية.
- حالة الوحدة: فلو تشطيب سوبر لوكس هيكون أغلى من النص تشطيب.
- عمر الوحدة: لأن الوحدات الجديدة هتكون غالية عن القديمة.
بس هتلاقي متوسط سعر المتر في الشقق في الكمبوندات الفاخرة هو 40,000 جنيه للمتر، ولو شقق في عمارات عادية يعني خارج الكمبوندات، هيبقى متوسط سعر المتر 25,000 جنيه، وممكن تلاقي وحدات أغلى بكتير حسب مواصفاتها وموقعها.
مميزات السكن في التجمع الخامس
خلينا نكون عمليين ونتكلم عن المميزات الحقيقية اللي هتحس بيها لو سكنت في التجمع الخامس:
- الموقع الاستراتيجي بالنسبة لسكان شرق القاهرة: فلو شغلك أو حياتك الاجتماعية في مدينة نصر أو مصر الجديدة أو العبور أو العاصمة الإدارية، فإنت هتوفر ساعات يومياً في المواصلات.
- تنوع الخيارات السكنية: ودي من أهم مميزات التجمع الخامس إنك هتلاقي خيارات لكل الميزانيات تقريباً سواء شقق صغيرة بميزانية محدودة أو شقق عائلية متوسطة أو فلل فاخرة.
- الخدمات التعليمية عالية الجودة: المنطقة فيها مدارس دولية كتيرة بتدريس مناهج بريطانية وأمريكية وكندية وفرنسية.
- كايرو فيستيفال سيتي: وده واحد من أكبر المولات في الشرق الأوسط في المنطقة، وبيلبي كل احتياجاتك سواء للتسوق أو الترفيه أو المطاعم.
- الكمبوندات المغلقة: أغلب الكمبوندات في التجمع مغلقة، وده بيوفر أمان وخصوصية للسكان، بالذات العائلات اللي عندها أطفال.
- الطلب على الإيجار: الطلب عالي بالذات من طلبة الجامعة الأمريكية والشباب اللي بيشتغلوا في العاصمة الإدارية والعائلات اللي بتدور على سكن قريب من مدينة نصر، وده بيخلي الاستثمار في التجمع مربح جداً..
- تطوير مشاريع البنية التحتية: الحكومة بتستثمر في تطوير البنية التحتية في المنطقة من خلال عمل طرق جديدة وكباري ومحاور، وده هيحسن من حركة المرور مستقبلاً.
عيوب السكن في التجمع الخامس
خلينا نكون صادقين ونتكلم عن المشاكل الحقيقية اللي ممكن تواجهك في المنطقة:
- الزحمة المرورية: ده أكبر عيب في التجمع الخامس، فعندك مثلاً أوقات الذروة من 7-10 صباحاً ومن 4-8 مساءً) محور التسعين بيبقى مزدحم جداً، الطريق الدائري بيبقى كابوس وممكن تقعد ساعة في الزحمة عشان تعدي كوبري أو تقاطع
- كثافة السكان عالية: في الأحياء القديمة زي الأول والثاني والثالث الكثافة السكانية بقيت عالية جداً، وده بيأثر على الزحمة في الشوارع وصعوبة إيجاد مواقف سيارات.
- البنية التحتية القديمة: فمثلًا الأحياء اللي اتبنت في التسعينات زي الحي الأول والتاني بدأت البنية التحتية فيها تتهالك ويحصل مشاكل في المجاري وانقطاع الكهرباء
- مفيش مترو: دي أكتر مشكلة بيعاني منها كتير من الناس، فلو معندكش عربية الحركة هتبقى صعبة، وعشان تعتمد على أوبر وكريم علطول الوضع هيكون مكلف جداً.
- المنطقة بعيدة عن غرب القاهرة: فلو شغلك أو حياتك الاجتماعية في المهندسين أو الجيزة أو الدقي أو 6 أكتوبر، هتعاني جداً في المواصلات اليومية.
معلومات عن الشيخ زايد
الشيخ زايد جزء من مدينة 6 أكتوبر، وسميت على اسم الشيخ زايد بن سلطان آل نهيان حاكم أبو ظبي السابق، اللي ساهم في تمويل المشروع في البداية، والمنطقة اتبنت في منتصف التسعينات كامتداد راقي لمدينة 6 أكتوبر، وكان الهدف منها جذب الطبقة الراقية والمتوسطة العليا.
الشيخ زايد معروفة بالتخطيط الجيد والمساحات الخضراء الواسعة والكمبوندات الفخمة، وده خلى المنطقة محتفظة بطابعها الراقي لحد النهاردة.
موقع الشيخ زايد الجغرافي
المنطقة بيحدها من الشمال الطريق الصحراوي (القاهرة – الإسكندرية) ومن الجنوب مدينة 6 أكتوبر ومن الشرق محور 26 يوليو والجيزة، ومن الغرب مدينة الشيخ زايد الجديدة وامتدادات 6 أكتوبر.
الشيخ زايد موقعه استراتيجي لأي حد شغله أو نشاطه في غرب القاهرة، يعني لو بتشتغل في المهندسين، الجيزة، الدقي، الهرم، أو 6 أكتوبر، الموقع ده هيوفر عليك وقت ومجهود.
لكن لو شغلك في شرق القاهرة زي مدينة نصر، مصر الجديدة، العاصمة الإدارية.. يبقى الشيخ زايد بعيد جداً ومش عملي ليك.
والمنطقة إجمالي مساحتها حوالي 40 كيلومتر مربع يعني حوالي 9,600 فدان، وده أصغر من التجمع الخامس لكن تخطيطها أفضل والكثافة السكانية فيها أقل.
أحياء الشيخ زايد
الشيخ زايد متقسم لـ 16 حي، ومرقمين من 1 لحد 16، ودي الأحياء السكنية الرئيسية:
- الحي الأول والثاني والثالث: ودول من أقدم الأحياء في الشيخ زايد، وفيهم فلل قديمة وكمبوندات مغلقة.
- الحي السابع (الكونتيننتال): وده من أشهر الأحياء وفيه فلل ضخمة وقصور، وده خلاه منطقة راقية جداً وهادية.
- الحي الثامن (بيفرلي هيلز): من أرقى الأحياء في الشيخ زايد وموجود فيه كمبوندات فخمة زيبيفرلي هيلز وذا أليجريا وجرين 5.
- الحي التاسع والعاشر والحادي عشر: ودول أحياء سكنية متوسطة إلى راقية وفيها كمبوندات وفلل.
- الحي الثاني عشر والثالث عشر: ودول أحياء حديثة وفيها مشاريع سكنية متنوعة كمان لسه هيحصل توسعات فيها.
- الحي السادس عشر (الربوة): وده منطقة راقية فيها فلل وكمبوندات.
الطرق الرئيسية في الشيخ زايد
الشيخ زايد فيه مجموعة من الطرق الرئيسية اللي لازم تعرفها، ودي أهمها:
- محور 26 يوليو: وده الشريان الرئيسي اللي بيربط الشيخ زايد بالجيزة والقاهرة، كمان الطريق ده سريع نسبياً، لكن في أوقات الذروة بيبقى زحمة.
- طريق الواحات: وبيربط الشيخ زايد بالطريق الصحراوي ومدينة 6 أكتوبر، ومميز بإنه واسع ومريح، وبيستخدم كبديل لمحور 26 يوليو لو في زحمة.
- الطريق الدائري: وده بيمر على أطراف الشيخ زايد من الناحية الشرقية.
- الطريق الصحراوي (القاهرة – الإسكندرية): وده بيحد الشيخ زايد من الشمال، وبيوصل لإسكندرية والساحل الشمالي.
أشهر الكمبوندات السكنية في الشيخ زايد
المنطقة فيها كمبودندات راقية جداً ومميزة بالخدمات المتكاملة، ودي أهمها:
1. كمبوند بيفرلي هيلز (Beverly Hills)
المشروع موجود في الحي الثامن في الشيخ زايد، وإجمالي مساحته حوالي 1,900 فدان، وأنواع الوحدات المتاحة فيه هي شقق ودوبلكس وتاون هاوس وتوين هاوس وفلل مستقلة.
وأسعار الشقق اللي مساحتها 150 متر بتتراوح بين 5,000,000 و 7,500,000 جنيه، لكن لو دوبلكس ومساحتها 250 متر هيتراوح سعرها بين 9,000,000 و 13,000,000 جنيه.
2. كمبوند ذا أليجريا (The Allegria)
مطور المشروع ده هو سوديك SODIC وإجمالي مساحته حوالي 1,100 فدان، وأنواع الوحدات الموجودة فيه هي شقق وتاون هاوس وتوين هاوس وفلل.
الأسعار لو شقة مساحتها 120 متر بتتراوح بين 4,500,000 – 6,500,000 جنيه، ولو توين هاوس هتتراوح بين 10,000,000 – 16,000,000 جنيه، ولو فيلا هتتراوح بين 15,000,000 – 35,000,000 جنيه.
المشروع مميز بإن فيه ملعب جولف 18 حفرة وتصميمه فاخر، كمان فيه مساحات خضراء واسعة ونوادي وخدمات راقية.
3. كمبوند جرين 5 (Green 5)
الكمبوند ده موجود في الحي الثامن بالشيخ زايد، وأنواع الوحدات السكنية فيه بتكون شقق فاخرة، والأسعار لو شقة 150 متر بتتراوح بين 5,500,000 – 8,000,000 جنيه.
مميزات السكن في الشيخ زايد
الشيخ زايد من المناطق المميزة بحاجات كتيرة، ودي أهم مميزات المنطقة:
1. التخطيط والتنظيم
الشيخ زايد من أفضل المناطق تخطيطاً في مصر لأن الشوارع عريضة ومنظمة وموجود فيها مساحات خضراء واسعة، كمان عدد السكان فيها قليل جداً مقارنة بالتجمع الخامس كمان البنية التحتية ممتازة.
2. المساحات الخضراء
واحدة من أكبر مميزات الشيخ زايد إن فيه أشجار كتيرة في كل مكان وحدائق عامة كبيرة، وده خلى الهواء أنظف من معظم مناطق القاهرة، كمان وفر بيئة هادية ومريحة للسكان.
3. جودة المدارس
المدارس في الشيخ زايد من أقوى المدارس في مصر، لأن فيه مدارس قديمة وعريقة زي نارمر والأورمان وBISC، كمان سمعتها سمعة قوية في السوق المصري ويتقدم مناهج متنوعة وجودة تعليمية عالية للطلبة.
4. الأمان والهدوء
الشيخ زايد معروف بالأمان لأن كل الكمبوندات تقريباً مغلقة ومؤمنة وكثافة السكان قليلة والشوارع نظيفة ومضاءة، كمان المكان آمن للسيدات والأطفال.
5. الموقع المميز لسكان غرب القاهرة
لو شغلك في المهندسين أو الجيزة أو الدقي أو 6 أكتوبر، فالموقع ده هيبقى ممتاز ليك وهيوفر عليك وقت كبير.
7. الكمبوندات الفاخرة
المكان فيه كمبوندات من أرقى ما يكون في مصر زي بيفرلي هيلز و ذا أليجريا، ودول مناسبين جدًا للطبقة الراقية.
عيوب السكن في الشيخ زايد
الشيخ زايد زي ما ليه مميزات كتيرة فيه مشاكل وعيوب بردو، والمشاكل دي أشهرها الآتي:
- الأسعار عالية جداً: الشيخ زايد من أغلى المناطق السكنية في مصر فسعر المتر أعلى من معظم المناطق، كمان رسوم الصيانة في الكمبوندات مرتفعة جداً، وتكلفة المعيشة بشكل عام عالية.
- البعد عن شرق القاهرة: فلو شغلك في مدينة نصر، مصر الجديدة، أو العاصمة الإدارية، هتعاني جداً لأن الرحلة اليومية ممكن تاخد ساعة ونص أو أكتر، وهتعدي القاهرة كلها كل يوم.
- البعد عن المطار: لو إنت بتسافر كتير فالوصول لمطار القاهرة بياخد وقت طويل ممكن يوصل لساعة ونص أو أكتر.
- خيارات الترفيه أقل: وده لو قارنها بكايرو فيستيفال في التجمع الخامس، هتلاقي إن خيارات الترفيه في الشيخ زايد محدودة شويه.
- المواصلات العامة شبه معدومة: لأن مفيش مترو ومفيش خدمة باصات عامة فعالة، عشان كده لازم يكون عندك عربية أو تعتمد على أوبر/كريم.
- بعض المناطق لسه تحت الإنشاء: فمنطقة الشيخ زايد الجديدة والامتدادات لسه تحت الإنشاء، وده معناه غبار وصوت في بعض المناطق هناك.
- الحياة الاجتماعية محدودة: وده عشان المنطقة هادية جداً، وده ممكن يكون عيب لو إنت شخص بيحب الحركة والحيوية.
- صعوبة الحصول على وحدة بسعر معقول: لأن الوحدات المعروض في الشيخ زايد أقل من التجمع الخامس، وده بيخلي المنافسة على الوحدات الكويسة عالية والأسعار كمان مبالغ فيها.
مين يختار التجمع الخامس؟
اختار التجمع الخامس لو شغلك في شرق القاهرة زي مدينة نصر، مصر الجديدة، العبور، العاصمة الإدارية، أو بتسافر كتير لأنه قريب من المطار، أو لو محتاج وحدات سكنية تناسب كل الميزانيات.
كمان لو بتحب الحركة والحيوية فالتجمع أنسب مكان ليك لأن فيه كايرو فيستيفال وكافيهات، وكمان لو مستثمر وعايز عائد إيجاري كويس وسيولة سريعة أو طالب أو موظف في الجامعة الأمريكية
مين يختار الشيخ زايد؟
اختار الشيخ زايد لو إنت شغلك في غرب القاهرة زي المهندسين، الجيزة، الدقي، 6 أكتوبر، أو عندك أطفال ومهتم بجودة المدارس العالية وبتحب الهدوء والمساحات الخضراء، كمان لو ميزانيتك مرتفعة وعايز تسكن في مستوى راقي فالشيخ زايد هيبقى مكان مثالي بالنسبة ليك.
في النهاية، مفيش منطقة أحسن من التانية بشكل مطلق، فكل منطقة ليها مميزاتها وعيوبها واللي يناسبك إنت بيعتمد على مكان شغلك ونشاطك اليومي وميزانيتك واحتياجات عيلتك وأولوياتك في الحياة.
فلو شغلك في شرق القاهرة ومحتاج خيارات متنوعة وحيوية.. التجمع الخامس هيكون الخيار المنطقي، ولو شغلك في غرب القاهرة ومهتم بالجودة والهدوء والمساحات الخضراء.. الشيخ زايد هو الأنسب ليك، وممكن تتواصل معانا عشان نساعدك في اختيار المنطقة المناسبة ليك حسب احتياجاتك وميزانيتك.
