لو معاك مبلغ كبير مستني تستثمره، وواقف قدام اختيارين واضحين تشتري وحدة إعادة بيع جاهزة تستلمها فورًا؟ ولا تحجز من المطور بسعر أقل وتستنى التسليم بعد كام سنة؟
السؤال ده بيواجه كل حد بيفكر في شراء عقار في مصر دلوقتي، ومش سهل إنك تختار لأن كل خيار ليه مميزاته وعيوبه، وكل واحد بيناسب ظروف وأهداف مختلفة.
فيه ناس كسبت فلوس كتير من إعادة البيع، وفيه ناس خسرت، وفي ناس اشتروا من المطور وارتاحوا وفي ناس ندموا، عشان كده في المقال ده هنوضحلك الصورة الكاملة بكل تفاصيلها والمميزات والعيوب والأرباح المحتملة والمخاطر الموجودة والتكاليف الحقيقية عشان في النهاية تقدر تاخد القرار اللي يناسب ظروفك وأهدافك بالضبط.
يعني ايه إعادة البيع (Resale)؟
ده معناه إنك بتشتري وحدة من مالك سابق، مش من المطور نفسه، والوحدة دي ممكن تكون اتسلمت فعلاً والمالك ساكن فيها أو أجرها، أو ممكن تكون لسه تحت الإنشاء والمالك عايز يبيع الحجز بتاعه قبل ما ياخد الوحدة.
السوق ده بيتسمى Secondary Market أو سوق إعادة البيع، وبيكون فيه عروض من ناس اشتروا من المطور قبل كده ودلوقتي عايزين يبيعوا لأسباب مختلفة زي إنهم محتاجين السيولة أو ظروفهم المالية اتغيرت أو عايزين يستثمروا في حاجة تانية أو ببساطة عايزين يكسبوا من فرق السعر، ودي أهم أنواع إعادة البيع:
- ريسيل جاهز ومتسلم: في النوع ده الوحدة بتكون جاهزة تسكن فيها فوراً أو تأجرها.
- ريسيل تحت الإنشاء: وده انت بتشتري فيه حجز من حد اشترى من المطور، والوحدة لسه بتتبني.
- ريسيل مع تشطيب: وفي النوع ده الوحدة بتكون متسلمة والمالك السابق شطبها.
- ريسيل بدون تشطيب: الوحدة هتستلمها فيه على المحارة أو نص تشطيب.
يعني ايه الشراء من المطور؟
الشراء من المطور معناها إنك بتحجز وحدة جديدة مباشرة من الشركة العقارية اللي بتبني المشروع، والوحدة عادة بتكون لسه تحت الإنشاء أو في مراحلها الأولى، وإنت بتدفع على أقساط لحد التسليم، وده اللي بيتسمى Primary Market أو السوق الأولي، وبتكون إنت أول مالك رسمي للوحدة، وبتتعامل مع المطور مباشرة، وبتوقع عقد رسمي معاه وبتلتزم بنظام السداد اللي هو حاطه.
إعادة البيع vs الشراء من المطور
دي مقارنة واضحة بين إعادة البيع والشراء من المطور من حيث فرق التوقيت والجاهزية والسعر:
1. الفرق في التوقيت والجاهزية
الفرق الأساسي بين الاتنين هو التوقيت، فإعادة البيع الجاهز بتديك وحدة تسكن فيها أو تأجرها فوراً ومفيش انتظار أو خوف من التأخير والوحدة هتكون قدامك وشايفها بعينك، ودي ميزة مهمة لو محتاج تسكن بسرعة أو عايز تبدأ تجمع إيجار فوراً.
لكن الشراء من المطور بيحتاج صبر، لانك ممكن تستنى سنة أو سنتين أو حتى أربع سنين لحد ما الوحدة تتسلم، وخلال الفترة دي إنت بتدفع أقساط لكن الوحدة مش في إيدك، ومش بتستفيد منها بأي شكل.
2. الفرق في السعر والتكلفة
عادة إعادة البيع بتكون أغلى من سعر المطور الحالي للوحدات المشابهة، خصوصاً لو الوحدة جاهزة أو في موقع ممتاز، وده سببه إن البايع عايز يكسب من الصفقة وكمان لأن الوحدة الجاهزة بتوفر عليك سنين انتظار وتوفر عليك مخاطر التأخير في التسليم.
لكن الشراء من المطور بيكون بسعر أقل في البداية، وبنظام سداد مريح يعني تدفع مقدم صغير نسبياً وباقي المبلغ على أقساط، وده بيخفف الضغط المالي في البداية.
3. الفرق في المخاطر
إعادة البيع فيها مخاطر قانونية ومخاطر متعلقة بحالة الوحدة، عشان كده لازم تتأكد إن البايع معليهوش أقساط متأخرة، وإن الوحدة مالهاش مشاكل قانونية، وإن حالتها الإنشائية كويسة، كمان للأسف مبيكونش فيهضمان من مطور على الوحدة غالباً.
والشراء من المطور فيه مخاطر تأخير التسليم وده شائع جداً في السوق المصري ومخاطر تغيير المواصفات أو التصميمات ومخاطر إن المطور يواجه مشاكل مالية وميكملش المشروع لكن ده قليل جداً أما بيحصل.
هل إعادة البيع أرخص من شراء عقار جديد من المطور؟
الحقيقة إن في أغلب الأوقات إعادة البيع بتكون أغلى من سعر المطور الحالي للوحدات الجديدة في نفس المشروع أو مشاريع مشابهة، لكن لازم نفهم ليه وإمتى ممكن يكون العكس، عشان الصورة تبقى واضحة.
السعر مش العامل الوحيد في المقارنة، لأن السعر الأرخص ممكن يطلع في النهاية أغلى لو حسبت التكاليف الخفية والوقت والمخاطر، وإعادة البيع بتكون أغلى عشان الأسباب دي:
1. البايع عايز يكسب
الشخص اللي بيبيع وحدة إعادة بيع مش بيبيعها بنفس السعر اللي اشترى بيه، لأنه دفع فلوس واستثمر وانتظر سنين، ودلوقتي عايز يسترد فلوسه مع ربح، والربح ده بيتراوح عادة بين 20٪ و 40٪ فوق السعر الأساسي حسب المنطقة والتوقيت.
يعني لو حد اشترى شقة من المطور بـ 2 مليون جنيه قبل 3 سنين، دلوقتي هيبيعها بـ 2.5 أو 2.8 مليون عشان يكسب، وده طبيعي ومتوقع في أي سوق.
2. الوحدة ممكن تكون متشطبة
لو الوحدة متشطبة فعلاً بتشطيب كويس فده بيوفر عليك تكلفة ووقت ومجهود التشطيب، لأن التشطيب الكامل لشقة 150 متر ممكن يكلف 400,000 لـ 700,000 جنيه حسب المستوى، فلو الريسيل متشطب، وسعره أغلى بـ 500,000 جنيه من وحدة المطور الغير متشطبة، يبقى السعر منطقي.
إمتى إعادة البيع ممكن تكون أرخص؟
فيه حالات معينة إعادة البيع بتكون أرخص فيها أو بنفس سعر المطور، ودي أهم الحالات:
- البايع محتاج سيولة بسرعة: لو البايع محتاج فلوس بسرعة عشان يستثمرها في حاجة تانية، فممكن يبيع بسعر أقل من السوق، وفي الحالة دي ممكن تلاقي صفقات كويسة جداً أو وحدة جاهزة بسعر قريب من سعر المطور أو حتى أقل.
- السوق في حالة ركود: هتلاقي إن في فترات الركود الاقتصادي أو لما الطلب على العقارات يقل، البائعين بيضطروا يقللوا الأسعار عشان يلاقوا مشترين، وممكن وقتها تلاقي إعادة بيع بأسعار تنافسية جداً.
- المطور رفع الأسعار بشكل كبير: فلو المطور رفع أسعار الوحدات الجديدة بشكل مبالغ فيه، ممكن تلاقي إن إعادة البيع من ملاك قدام اشتروا بأسعار أقدم أرخص من الوحدات الجديدة دلوقتي.
ما هي الأرباح المتوقعة من بيع الريسيل بعد سنة أو سنتين؟
بالنسبة للأرباح الواقعية في السوق المصري من بيع الريسيل فبتتحدد بناءً على بيانات السوق الفعلية في السنين الأخيرة، كمان الأرباح من إعادة البيع بتختلف جداً حسب المنطقة والتوقيت ونوع المشروع، فالمناطق القوية زي العاصمة الإدارية ـ الداون تاون والتجمع الخامس معدل الربح المتوقع فيها بعد سنة هيكون 8-15٪ لو السوق مستقر، ومعدل الربح المتوقع بعد سنتين هيكون 15-25٪ في الأحوال العادية، وبعد 3 سنين هيكون 25-40٪ لو السوق نامي.
وبالنسبة للمناطق المتوسطة زي الشيخ زايد والعاصمة والأحياء السكنية)، فمتوقع الربح بعد سنة هيكون 5-10٪، وبعد سنتين هيكون 10-18٪، وبعد 3 سنين هيبقى 18-30٪.
أما المناطق الجديدة أو البعيدة، فالربح المتوقع بعد سنة هيبقى صفر أو محتمل تحصل خسارة، وبعد سنتين معدل الربح المتوقع هيتراوح بين 0-10٪، وبعد 3 سنين ممكن يتراوح بين 10-20٪ لو المنطقة اتطورت.
خلي بالك إن كل الأرقام دي تقريبية ومبنية على أداء السوق التاريخي، لكن مفيش ضمانات، لأن ممكن السوق ينزل والأرباح تختفي أو تتحول لخسارة.
متى يكون الشراء من المطور أفضل من الريسيل في العاصمة الإدارية؟
العاصمة الإدارية سوق خاص ومختلف عن باقي مناطق القاهرة والجيزة، والأسعار فيها ارتفعت بشكل كبير بالذات في السنين الأخيرة والسوق فيها نشط، لكن فيه اختلافات كبيرة بين المناطق المختلفة جوه العاصمة نفسها، عشان كده لازم نفهم إمتى الشراء من المطور بيكون الخيار الأفضل وإمتى إعادة البيع بتكون أنسب.
القرار ده مبيعتمدش بس على السعر، ده بيعتمد على أهدافك وميزانيتك وقدرتك على الانتظار وومستوى المخاطرة اللي تقدر تتحمله، وعملية الشراء من المطور أفضل في الحالات دي:
- لو عندك ميزانية محدودة ومحتاج تقسط: لأن المطورين في العاصمة بيقدموا أنظمة سداد مرنة جداً يعني مقدم 5-10٪ وباقي المبلغ على 6-8 سنين في بعض المشاريع، ة ده بيخليك تقدر تشتري وحدة بمقدم صغير نسبياً، وتوزع باقي المبلغ على سنين.
- لو عايز تضمن وحدة في موقع أو تصميم معين: لأن المطورين بيقدموا خيارات متنوعة في التصميمات والمساحات والأدوار، وتقدر تختار الدور اللي يناسبك والإطلالة والتصميم الداخلي في بعض المشاريع، وده بيديك حرية أكبر في تخصيص الوحدة.
- لو واثق في المطور ومش خايف من التأخير: فلو المشروع من مطور كبير وموثوق عنده سجل تسليم كويس في العاصمة زي سوديك وماونتن فيو وبيتا إيجيبت، وإنت تقدر تستنى سنتين أو تلاتة، فالشراء من المطور بيكون منطقي لأنك بتاخد سعر أقل من الريسيل، وبتستفيد من نظام السداد المرن.
- لو مستعد تنتظر وهدفك استثمار طويل المدى: يعني لو هدفك إنك تحتفظ بالوحدة 5–7 سنين وبعدين تبيع أو تأجر، الشراء من المطور بيديك أفضل قيمة، لأنك بتدخل بسعر أقل، وعلى مدار السنين، قيمة الوحدة هتزيد والأرباح المتوقعة هتكون أعلى من لو اشتريت ريسيل بسعر أعلى.
امتى إعادة البيع تكون أفضل؟
فيه شويه حالات إعادة البيع فيها بتكون أفضل زي:
- لو محتاج تسكن فوراً أو تأجر بسرعة: لأن الريسيل الجاهز بيحل المشكلة فوراً، فانت هتقدر تسكن في نفس الشهر أو تأجر والإيجار يبدأ يدخل فوراً ومفيش انتظار ومفيش قلق.
- لو مش عايز تتحمل مخاطر التأخير: لأن التأخير في التسليم واقع مؤلم في السوق المصري حتى المطورين الكبار ممكن يتأخروا 6 شهور أو سنة عن الموعد المحدد، فلو مش عايز تتحمل المخاطرة دي، الريسيل الجاهز هيشيل عنك القلق ده.
- لو عندك السيولة الكافية وعايز أصل ثابت فوراً: فلو معاك الفلوس كاملة أو معظمها، وعايز تشتري أصل ثابت يحفظلك قيمة فلوسك من التضخم، فالريسيل الجاهز في موقع ممتاز في العاصمة بيكون استثمار ممتاز، لأن الوحدة بتكون جاهزة وفي منطقة مطلوبة وتقدر تستفيد منها فوراً.
- لو لاقيت صفقة ريسيل بسعر معقول: أحياناً بتلاقي عروض ريسيل بأسعار تنافسية لأن البايع محتاج سيولة أو مستعجل أو السوق في فترة ركود، فلو لاقيت وحدة جاهزة بسعر قريب من سعر المطور أو بفرق صغير (10-15٪ فقط)، فده deal ممتاز ولازم تستغله.
ما هي المخاطر القانونية في صفقات إعادة البيع؟
المخاطر القانونية في إعادة البيع من أكبر المشاكل اللي ممكن تواجهها وتحول الصفقة من استثمار ناجح لكابوس للأسف، لأن السوق فيه حالات كتير من النصب أو المشاكل القانونية اللي بتظهر بعد الشراء وبتكلف المشتري فلوس ووقت ومجهود ضخم، ولازم تكون واعي تماماً بالمخاطر دي وتعرف إزاي تحمي نفسك.
المشكلة الأساسية إن إعادة البيع بتتم بين أفراد، مش مع مطور عنده كيان قانوني واضح ومصلحة في الحفاظ على سمعته، والبايع الفرد ممكن يخبي معلومات، أو يكون عليه مشاكل قانونية، أو حتى يكون نصاب بيحاول يبيع وحدة مش ملكه، فخلينا نتكلم بصراحة عن كل المخاطر اللي ممكن تقابلها:
1. البائع عليه أقساط متأخرة أو مديونيات للمطور
الخطر ده من أكتر الحاجات شيوعاً في سوق إعادة البيع، لأن البائع ممكن يكون اشترى الوحدة من المطور بنظام أقساط، ولأي سبب مش قادر يلتزم أو ناسي أو متعمد بقى عليه أقساط متأخرة، طب إيه اللي ممكن يحصل لو اشتريت من بائع عليه أقساط متأخرة؟
لما تروح تنقل الوحدة على اسمك، المطور هيرفض يتم النقل لحد ما كل المديونيات تتسدد، يعني ممكن تدفع للبائع المبلغ المتفق عليه، وبعدين تكتشف إن عليه 200,000 أو 300,000 جنيه متأخرة لازم تدفعها إنت عشان تقدر تنقل الوحدة.
كمان فيه حالات أسوأ إن المطور ممكن يكون ألغى الحجز بسبب التأخير المتكرر، والبائع بيحاول يبيع وحدة هو مش مالكها أصلاً، فلو حصل كده، إنت هتخسر فلوسك بالكامل.
عشان كده قبل ما تدفع أي فلوس، اطلب من البايع كشف حساب رسمي من المطور (Statement of Account) يوضح كل الأقساط المدفوعة والمتأخرة واتصل بالمطور مباشرة وتأكد من البيانات واشترط في العقد إن البائع يسدد كل المديونيات قبل نقل الملكية، أو اخصم المبلغ من سعر الشراء وادفعه إنت للمطور مباشرة.
2. الوحدة عليها مشاكل قانونية أو نزاعات ملكية
المشكلة التانية إن الوحدة تكون عليها نزاع قانوني يعني البايع متنازع مع المطور على حاجة، أو في نزاع ورثة زي إن البايع واحد من الورثة والباقي مش موافقين على البيع، أو الوحدة محجوزة من جهة قضائية بسبب قضية، طب إيه اللي ممكن يحصل؟
لو اشتريت وحدة عليها مشاكل قانونية، ممكن البيع يتلغى بحكم قضائي، وإنت تخسر الوحدة حتى بعد ما دفعت فلوسك، أو ممكن تدخل في قضايا قانونية طويلة مكلفة عشان تثبت ملكيتك.
عشان كده اطلب شهادة من المطور إن الوحدة مافيهاش أي مشاكل قانونية أو نزاعات، ولو الوحدة في مشروع قديم واتسلم وفيه عقد ملكية مسجل، اطلب محامي يعمل فحص قانوني على العقد والملكية، ومتشتريش وحدة في نزاع ورثة إلا لو كل الورثة وقعوا على البيع رسمياً.
3. التلاعب في مساحة الوحدة أو حدودها
فيه حالات البايع أو حتى المطور ممكن يكون غير في حدود الوحدة أو المساحة بشكل غير قانوني يعني مثلاً دمج شقتين مع بعض أو زود مساحة من المساحات المشتركة، أو غير في التصميم الإنشائي، طب إيه اللي ممكن يحصل لو عمل كده؟
لما تيجي تسجل الوحدة رسمياً المساحة أو الحدود مش هتكون مطابقة للمستندات الرسمية والتسجيل هيترفض، أو المطور أو إدارة الكمبوند ممكن يطالبوك ترجع الوحدة لوضعها الأصلي على نفقتك.
وحل المشكلة دي إنك تقارن المساحة والتصميم الفعلي للوحدة مع المخططات الرسمية من المطور، ولو فيه أي تعديلات إنشائية، تأكد إنها معتمدة رسمياً من المطور والشهر العقاري.
4. البايع مش المالك الأصلي
فيه حالات نصب إن البايع ممكن يكون مش المالك الحقيقي وممكن يكون مستأجر أو وسيط بيتظاهر إنه المالك أو حتى شخص مزور مستندات.
ووقتها انت ممكن تدفع فلوسك وتكتشف إن الشخص اللي بعتلك ملوش علاقة بالوحدة أصلاً، وده بيكون نصب صريح وهتخسر فلوسك.
عشان كده لازم تطلب إثبات شخصية للبائع (بطاقة، جواز سفر)، وتقارن الاسم ببيانات العقد الأصلي مع المطور، وتتصل بالمطور وتتأكد إن الشخص ده فعلاً هو المالك المسجل عندهم، ومتدفعش أي فلوس قبل أنا محامي يراجع كل المستندات.
5. عدم وجود عقد رسمي واضح وملزم
البايع ممكن يتراجع عن البيع، أو يطالب بفلوس إضافية أو يبيع الوحدة لشخص تاني في نفس الوقت، ومن غير عقد واضح مش هتقدر تثبت حقك قانونياً.
عشان كده لازم تعمل عقد بيع ابتدائي رسمي موثق من محامي أو شهر عقاري قبل ما تدفع أي فلوس، والعقد لازم يوضح كل التفاصيل زي السعر وطريقة السداد وموعد التسليم ومواصفات الوحدة والمسؤوليات وشروط الفسخ، كمان حاول متدفعش المبلغ كامل قبل نقل الملكية رسمياً، وادفع جزء والباقي بعد إتمام النقل.
هل يمكن للمطور منع إعادة بيع الوحدة قبل التسليم؟
ده سؤال قانوني مهم جداً ومحير لكتير من الناس اللي بيشتروا بهدف إعادة البيع السريع، والإجابة مش بسيطة لأنها بتعتمد على شروط العقد اللي وقعته مع المطور، وعلى سياسة المطور نفسه وعلى القانون، والحقيقة إن المطورين في مصر بدأوا في السنين الأخيرة يحطوا قيود وشروط على إعادة البيع قبل التسليم، وده بيخلق مشاكل كتير للمستثمرين اللي كانوا بيعتمدوا على استراتيجية الشراء وإعادة البيع السريع، طب ليه المطورين بيمنعوا إعادة البيع؟
قبل ما نتكلم عن القانونيات، خلينا نفهم الأول ليه المطورين مش عايزين الناس تبيع قبل التسليم، وده ممكن يكون بسبب إن المضاربة بتضر بسمعة المشروع، فلما يكون في مضاربة كتير على مشروع معين وناس بتشتري وتبيع بسرعة والأسعار بتقفز بشكل مبالغ، ده بيخلق انطباع سلبي عند المشترين الجادين، لأن الناس اللي فعلاً عايزة تسكن أو تستثمر طويل الأجل بتحس إن السوق مليان مضاربين والأسعار عالية فبيبعدوا عن المشروع.
كمان ممكن يكون بسبب إن المطور عايز يتحكم في اللي يسكن في مشروعه، فالمطورين الكبار بيهتموا بإن الكمبوند أو المشروع يبقى فيه مستوى سكان معين، ولو سمحوا بإعادة البيع الحرة، ممكن الوحدات تروح لناس مش من الفئة المستهدفة وده يأثر على البريستيج والسمعة.
أو بسبب إن المطور عايز يبيع الوحدات المتبقية بسعر أعلى، فلو المطور لسه عنده وحدات جديدة للبيع ومالكين بيبيعوا وحداتهم بسعر أقل، ده بيضر مبيعات المطور، لأن العملاء هيروحوا يشتروا ريسيل أرخص بدل ما يشتروا من المطور.
إيه اللي يحصل لو بعت من غير موافقة المطور؟
لو فيه بند في العقد بيمنع أو بيشترط موافقة المطور، وإنت بعت من غير ما تاخد الموافقة، فده بيعتبر خرق للعقد، لأن المطور ممكن يعمل واحد من التالي:
- رفض نقل الملكية: ولما المشتري الجديد ييجي ينقل الوحدة على اسمه، المطور هيرفض، وبالتالي المشتري مش هيقدر يسجل الوحدة باسمه أو ياخدها رسمياً.
- إلغاء الحجز: فيه حالات المطور ممكن يلغي حجزك بالكامل ويسترد الوحدة، ويرجعلك الفلوس اللي دفعتها أو جزء منها حسب شروط العقد، وده كارثة طبعاً، لأن إنت ممكن تكون خسرت فرصة زيادة السعر، أو تكون اتفقت مع مشتري ومش قادر تسلمله.
- فرض غرامات أو رسوم: وهنا المطور ممكن يوافق على النقل لكن يفرض عليك غرامة مالية كبيرة كعقوبة على خرق العقد.
عشان كده قبل ما تشتري من مطور بهدف إعادة البيع، اقرا العقد كويس جداً وركز على البنود المتعلقة بإعادة البيع ولو مش فاهم البند، استعين بمحامي يشرحهولك، ولو فيه قيود كتير أو منع، فخد ده في الاعتبار في استراتيجيتك الاستثمارية.
أي خيار أسرع للسكن الريسيل الجاهز ولا الشراء من المطور؟
السؤال ده إجابته واضحة وهي إعادة البيع الجاهزة أسرع بكتير ومفيش مقارنة أصلاً، لأن إعادة البيع الجاهزة معناها إن الوحدة متسلمة ومتاحة للسكن فوراً أو خلال أيام من إتمام الصفقة، وبمجرد ما توقع العقد وتدفع، تقدر تبدأ تنقل أثاثك وتسكن خلال أسبوع أو أسبوعين على بكتير وإنت جوه شقتك.
لكن الشراء من المطور معناه انتظار، والانتظار ده ممكن يطول سنة أو سنتين أو تلاتة أو حتى أربع سنين، وده لو المطور التزم بالمواعيد وده نادراً لو حصل في السوق المصري.
أفضل نصائح للاختيار بين الريسيل والمطور
دي بعض النصايح اللي هتساعدك تختار بين الريسيل والمطور:
- اعرف هدفك بالظبط: لة سكن فوري يبقى ريسيل أفضل خيار قدامك، لكن لو استثمار طويل يبقى مطور أحسن.
- احسب التكلفة الإجمالية مش السعر المعلن: زي ما شرحنا لأن التكاليف الخفية ممكن تقلب الموازين.
- شوف سمعة المطور لو هتشتري منه: فلو مطور كبير وموثوق زي بالم هيلز يستاهل الانتظار، ولو مطور صغير أو مشكوك فيه يبقى الريسيل أمن.
- متستعجلش: سواء ريسيل أو مطور، خد وقتك في المقارنة والبحث، لأن الصفقات الجيدة مش هتخلص بكرة.
- استعن بمحامي: لأن في كل الحالات، المحامي هيوفر عليك مشاكل ضخمة محتملة.
دلوقتي بقى عندك كل المعلومات اللي تحتاجها عشان تختار بين إعادة البيع والشراء من المطور، ومفيش إجابة صح أو غلط مطلقة لأن كل خيار ليه مميزاته وعيوبه، وكل واحد بيناسبه ظروف وأهداف معينة.
إعادة البيع الجاهزة بتديك السرعة والأمان وتجنب مخاطر التأخير، لكن بتكلفة أعلى، والشراء من المطور بيديك سعر أقل ونظام سداد مرن، لكن بيحتاج صبر وبيحمل مخاطر.
ولو لسه محتار أو عايز تقارن مشاريع معينة، تقدر تتواصل معانا وفريقنا هيساعدك تاخد القرار الأنسب لظروفك وأهدافك.
الأسئلة الشائعة
أيوة لكن بشروط أصعب شوية، لأن البنوك بتفضل تمويل الشراء من المطور لأن العلاقة مباشرة والضمانات أوضح، وفي حالة الريسيل، البنك بيطلب تقييم عقاري مستقل للوحدة، وغالباً نسبة التمويل بتكون أقل (60-70٪ من القيمة بدل 80-85٪)، كمان الفوايد ممكن تكون أعلى شوية ومدة القرض أقصر.
ميزة كبيرة لو إنت مستثمر مش ناوي تسكن، لأن الوحدة المؤجرة بتثبت إن في طلب على الإيجار في المنطقة دي، وبتوفر عليك مجهود البحث عن مستأجر، كمان تقدر تحسب الـ ROI الفعلي بناءً على الإيجار الحالي، لكن عيب لو إنت عايز تسكن فوراً، لأن هتحتاج تستنى لحد ما عقد الإيجار ينتهي أو تتفاوض مع المستأجر على الخروج المبكر.
